搏馬幾時都要有運，冇運叻極都冇用，睇番鄭俊偉最近一場頭馬「真跑得」，82倍大冷馬終點前粉碎李易達「駕迅」贏馬夢。所以贏馬幾時都要有運氣幫手，鄭俊偉上周去到車公廟拜神，盼早日能贏多場頭馬畢業。有消息指出，今次第一場第五班一千米列陣嘅「有情風」，絕對有本錢替馬房湊夠第十六場頭馬。呢隻老馬今季喺鄭俊偉手上已交出一場頭馬，由柏寶策騎喺一千米爆33倍大冷門，所贏對手係「雷超」及「要風得鋒」，最近一仗呢隻馬由季內贏馬拍檔柏寶出戰谷草千二米，大敗七個幾身位而回，呢仗頭馬屬「神寶金剛」，點解輸得咁慘，大家可以睇睇呢場柏寶點樣演繹呢隻馬，前段狂搶，未入彎經已腳軟，結果包尾而回，睇番隻馬過往上名或取得頭馬跑法，都係跟好位留衝一段，搶放帶頭呢種跑法絕對唔適合「有情風」發揮，不過，明知呢隻馬冇狀態爭勝，輸場遠遠哋，然後再俾隻馬有充分嘅休息時間作回氣部署，今次跟上場相隔時間有三個幾月，可以話夠晒回氣時間，馬房為咗令到呢隻九歲老馬重新恢復角逐興趣，近期搵番韋達同隻馬彈課大閘先至上陣。大家都知道，韋達過往亦曾替呢隻馬贏過，亦屬知馬性發揮，所以唔驚呢隻馬屆時發揮唔出水準，今次呢場五班一千米，係水兵鬥海軍場合，講贏得頭馬最多，「有情風」呢個路程取得四W，可以話多過同場任何一匹對手，所以值得大家作為優先捧場對象，鄭俊偉應可靠佢上岸。