R&F富力(香港)足球隊主教練楊正光
雖然世界盃已嚟到8強，但之前16強嘅賽事有好多場都極富話題性，當中賽後較多人討論嘅一定係日本被比利時絕殺呢一場，就連我去酒樓飲茶都聽到有好多人賽後戥日本輸咗好唔抵，我即時感覺係踢得漂亮而輸波好，定係踢得好差而幸運贏波好呢？當然兩者兼備就最完美啦，但試問喺高水平嘅足球世界裡又有幾多隊可以長期保證到這兩點呢？西班牙就係一個好例子，曾幾何時好多人都想學踢西班牙式足球，搓傳走位，細膩腳法，而最重要又贏到世界冠軍，試問又有邊個唔想學到佢哋呢？但今屆好多人就責怪佢哋搓傳波太多，攻不銳，守不穩，咩西班牙式足球已過時，最主要係佢哋16強出咗局，足球就係最現實，90分鐘決定你成功與失敗。
講返日本隊，我都覺得佢哋對比利時踢得非常精彩，最後輸咗係一個遺憾，除咗球員表現出極大信心外，面對住身形高大嘅對手，以傳球、走位配合，最重要係每一位球員都具備共同嘅意識，聰明嘅打法一度令比利時陷於苦戰。其實主教練西野朗嘅戰術亦係應記一功，面對住比利時不退縮，仲同對手鬥攻，可以見到佢嗰份決心同膽識，對球員們嘅信心及信任十足。作為一個教練，每落一個決定對整個形勢及戰果都有好大嘅變化，所以當決定咗就唔可以後悔，最後結果係點，都要勇敢面對及承擔，所以今次我覺得西野朗係最成功嘅失敗者。