楊正光 R&F富力(香港)足球隊主教練
今日嚟到世界盃決賽嘅日子，好榮幸揭幕戰及閉幕戰都係由我喺度同大家分享波經。時間過得真係快，以往睇過好多屆世界盃，今屆可以話係最深刻，因為以往我只係一個觀眾，但係今年我參與咗好多關於世界盃嘅活動，例如：首次做live嘅評述，寫專欄等等，令我對今屆賽事更加投入，更用心去分析吓各隊嘅表現，其實對我嘅教練工作亦都有所領悟以及提升，喺度要感謝各位畀機會我同幫助過我嘅人。
講返今晚兩隊主角法國同克羅地亞，老實講，我之前唔太睇好法國隊，因為今屆整隊平均實力未算係咁多隊種子隊中最強，但隨住喺16強以技術性擊倒阿根廷後，整體表現亦漸入佳境，每個球員都踢出信心，除咗爆紅嘅麥巴比，中場穩健嘅簡迪，加埋表現成熟嘅基沙文外，仲彈起咗兩位唔算太出名嘅左右後衛班捷文柏華特同盧卡斯靴南迪斯，呢兩位球員嘅後上助攻力強，所以令麥巴比同基沙文喺前場中路可以更自由走動，拉開對方後衛製造傳中同射門機會。
至於首次打入世界盃決賽嘅克羅地亞，之前先後3場賽事都要去到加時或互射12碼先贏對手，仲有佢哋好幾場比賽都係先落後反勝，呢隊波可謂係韌力十足，只係擔心佢哋嘅體能可唔可以喺咁短時間內完全恢復到，但無論如何，今晚呢場決賽絕對會係一場鬥智鬥力嘅激戰。