香港文匯報訊 無綫小花朱晨麗在主演的新劇《特技人》中，除了應付多場動作戲之外，也有與「大師兄」譚俊彥有感情線，日前播出的二人結婚戲，其實只是一場戲中戲，最後譚俊彥更要抱起朱晨麗逃走。
雖然譚俊彥在鏡頭前表現型到爆，但其實有苦自己知，因為拍攝該場戲份前一天，譚俊彥在拍攝中途手部受傷，並要入院縫廿多針，但翌日便要繼續拍動作戲，令朱晨麗也擔心非常，她說：「因為佢要抱起我，我驚佢隻手個傷口爆，所以我自己都有就力，令佢冇咁辛苦，好在最後拍幾次就OK！」
講到跟譚俊彥合作，朱晨麗表示很放心，大讚對方一直表現很淡定，她說：「真係好似『大師兄』咁，好照顧我哋成team人，記得舊年開工頭幾日佢生日，我就準備咗個蛋糕一齊慶祝，當時大家都未熟，佢有少少尷尬，不過好快熟絡。最深刻係拍kiss戲，因為當時佢個仔出世第二日，成個劇組都戥佢再做爸爸開心，我覺得譚俊彥直頭係大贏家，太太生完第二日就kiss第二個，好有艷福！」