■馬浚偉為其監製及構思的新節目進行拍攝。香港文匯報訊 藝人馬浚偉昨日為其監製及構思的新節目《同理．繼續走》進行拍攝，在現場與其羽毛球教練比賽，傷健人士Apple與朋友在場觀看。馬仔說：「節目會在不同平台播放，有信心大家會在免費電視台看到。個節目同娛樂無關，係社會時事性，會有七個主題，例如殘障人士、情緒病、劏房問題等等。其實我想做呢類節目好耐，一直有個心願係做同社會有關的事，趁自己有心有力就去做，都得到好多朋友支持。」
他透露已籌備節目一年，三個月前正式執行，預計10月份完成所有拍攝，節目中部分個案由青聯轉介，部分是他認識的朋友：「好似今日位女主角Apple，我們是在羽毛球場上認識，因為佢好鍾意睇羽毛球賽，經常會見到佢，有次照顧他的社工問我可唔可以同Apple合照，跟住就成為咗facebook朋友。」問到投資金額，他指有老闆投資，自己只是投資時間及心血，並認為回本不難：「因為我們製作費唔高，唔需要華衣美服或者富麗場景，最重要係寫實，我們連講稿都無。」