呢個禮拜日本地跑十場賽事，期間仲轉播一場韓國泥地短途錦標來港受注，編喺兩點四十五分開跑，變成有十一場馬賭，本地賽頭場開跑時間提早喺十二點五十分，比起平時早十分鐘。呢場韓國短途泥地錦標，香港有「藍天堡馬」作代表，徐雨石並非第一次派馬遠征，早於○七至○八年度馬季，曾經派過隻「幸運駿駒」到杜拜跑金莎軒大賽，卻未有成績交出，相隔十年後，馬房作第二度遠征，當然希望有突破。至於到韓國替「藍天堡馬」披甲嘅騎師係梁家俊，此子昨日（周四）經已跟妻兒啟程出發，徐雨石稍後至動身，騎練攜手在韓國打天下前，周三呢路人馬經已爆冷贏隻「魅力小子」壯行色，總算係個好兆頭。講到梁家俊，佢早前亦曾到過杜拜替蘇偉賢馬房嘅「經典帝國」披甲，但起步未幾即跌馬，呢次替「藍天堡馬」出戰，必定想搵個機會洗冤鬱氣。梁家俊已啟程赴韓，至於徐雨石尚要打點周日戰馬，吩咐好一切事宜至能動身，所以意味着呢個馬房，倉主除重視遠征嘅「藍天堡馬」外，尚要留意本地嘅戰馬，當中由李易達散倉加盟嘅「及時行樂」便要注視。隻馬上手練馬師訓練雖然贏馬次數唔多，但經常跑得近，且狀態容易保持，暑期後轉入徐雨石馬房，快試、彈大閘及拍跳工夫未有停止過，所以講狀態與上季長期跑入前列相比，可以話有過之而無不及，今次出戰第八場四班千四米草地，用楊明綸披甲，人馬有過合作默契值得一捧。