開鑼日一批從化兵雖然冇頭馬交出，但大多數跑來都有板有眼，更有「海明珠」及「一定賺」跑入亞軍，結果呢頭未講完，嗰頭相隔三日跑夜賽，第一隻從化兵取勝就係出自沈集成馬房嘅「最驫」，仲有其他從化兵例如「麯院風荷」及「夢幻仙子」一對蘇偉賢戰馬，獲得亞軍成績，所以整體上從化兵訓練有素，陣上依然可以視為實力分子看待。
例如夜賽兩隻蘇偉賢馬房從化兵「麯院風荷」及「夢幻仙子」，倉主打磨有度，落到香港立刻適應環境，陣上又好快交出水準，足見倉主對訓練從化兵心得有番咁上下，呢次蘇偉賢馬房又有匹從化兵值得大家留意，呢隻就係出戰第九場三班千二米泥地嘅「鐵膽王」。呢隻馬七月十二日經已到達從化，一直操到八月十四日至返香港，亦即係講雖然七月十五日沙田馬場煞科，儘管馬場暫停操練，但呢隻馬可以安排喺呢個時段去從化備戰，暑期實際冇停過操練。八月十四日返港後，馬房即替呢隻馬進行積極打磨，八月二十七日安排彈課泥地大閘，走位3 3 1，末段鞍上人潘頓扯大纜咁，依然贏第二及第三名馬「再石磨藍」及「盈利駿馬」近兩個身位，呢一課所見，七歲老黃忠暑期操練得宜，表現有火有力。本來馬房並唔係替呢隻馬報戰今次三班泥地千二米，而係開鑼賽三班田草千二米，馬房一心以為潘頓會為呢隻馬出戰，但報名期間，潘頓向蘇偉賢表示，原來佢一早應承咗騎羅富全馬房嘅「極速駿馬」，所以未能跑「鐵膽王」，倉主也知情識趣，冇將「鐵膽王」夾硬報名，因為到時要搵其他騎師幫手，於是開鑼日忍了一戰，專登留待今次三班泥地千二米列陣，最終可以用番潘頓披甲，查實呢隻馬跑泥地威力一定唔差得過草地，呢次人馬最佳組合而來，是擺明車馬要打硬仗。