丁冠豪父親開車房，屬於自己生意，今季個仔做練馬師，亦樂於做跟得老竇，一得閒就入馬房幫手，睇到個仔有咁嘅成就，當然老懷安慰。一個新倉跑三個賽馬日經已取得三場頭馬，以現時有限兵力，有咁嘅成績，證明咗一樣嘢，佢係有料新紮練馬師。
當然小丁開倉立刻取得好成績，功勞唔止佢一個人，仲有副練周瑞麟，大家未必知周瑞麟係乜水，講番上季佢嘅職位先，乃姚本輝副練，佢拍咗姚本輝好多年，姚廄長期成績唔曳，都係多得佢，不過，由於姚本輝個仔攞到副練馬師牌，周瑞麟迫住要搵第二個倉口落腳。呢個時候，小丁突然接獲發牌消息，一時間亦未準備好副練搵邊個，周瑞麟膽粗粗搵丁仔一試，結果成就咗呢個組合。
講番丁冠豪呢個倉，上周日冇派馬上陣，今次夜賽派出「喝采」（圖8號）、「自由飛翔」及「幸運神駒」出賽，呢三隻馬，「自由飛翔」用梁家俊，「喝采」及「自由飛翔」用蔡明紹，當中告達理寶藏「喝采」最值得大家留意。其實，「喝采」質居四班贏馬能力唔需要懷疑，上季在告達理倉贏過場谷草千二米，以頸位贏「慣勝積極」，建功騎師正係蔡明紹，但之後一直跑唔番贏馬水準，倉主更飛起贏開呢隻馬嘅蔡明紹，轉用其他騎師，結果都贏唔到，點解有咁嘅情況出現，呢啲就係弱勢馬房嘅問題，其實，呢隻馬成日有戰鬥水準，但始終屬尺寸型後上短途馬，如果冇一位大師傅成日跟住佢，知道佢嘅特性，陣上係唔易發揮出水準，呢次隻馬配番蔡明紹正係深慶得人，呢隻馬由八月中開始，已見蔡明紹操練，無論內圈踱步，大圈快跳及試大閘，都見蔡明紹親自打磨，重視程度可想而知，呢隻告達理遺留落嘅寶藏，有機會再替丁仔增添頭馬成績。