本來呢季想申請調去告達理舊馬房嘅麥菲文，因為現時告達理個倉要進行翻新工程，所以申請被拒，麥菲文只好維持現狀，依然喺奧運倉，新季成績經已要納入正式計算之列，所以再唔係好似上季咁，贏唔夠十六場都唔使接警告信，馬房亦知道新一季嘅嚴峻性，所以旗下馬匹谷到有番咁上下水準至跑。呢次出戰第六場三班一千米嘅「棗棗幸運」，馬房用王牌報名必有料到。大家睇番呢隻馬上季賽績，首戰跑谷草一千米，賠率只得八倍，但跑包尾；翌仗出戰谷草千二米，因賽前發覺右前腳不良於行退出；復出轉戰田草直路賽，卻放入亞軍；之後增程跑田草千二米，結果大敗十六個半身位。賽後檢討，呢隻馬出腳依然唔多暢順，仲未完全適應轉彎賽道。所以上季「棗棗幸運」跑得唔多，大部分時間被安排晨課操練，等隻馬喺出腳方面可以協調。經過一個暑假適應，隨着馬齡增加，現時「棗棗幸運」經已比上季大有進步。八月廿五日試一千米直路大閘，鞍上人是祈普敦，走位2-3-9，咪以為呢隻馬直路越跑越退，其實鞍上人教緊隻馬韁口及出腳，鞍上人用韁繩指示，唔需要太過急，最緊要落腳有條理，唔好因為緊張而亂咁出腳，呢一課正好反映「棗棗幸運」本身嘅進步。今次跑一千米，呢隻馬本身有速度，假如受祈普敦控制嘅話，大有機會喺今場發揮真正威力取勝，暑期當新郎哥嘅祈普敦，呢季獲麥菲文支持，希望呢隻馬會成為佢嘅結婚禮物。