「寫錯」眾籌戶口好弔詭 網民譏「掠水一戰」
喺選舉時籌錢唔係咩奇怪事，但臨近選舉無端端走去籌，仲一開口就一人一千蚊咁大咬就真係未見過。九龍西候選人李卓人近日出post，話要財政支援去補充更多宣傳品，但就獅子開大口叫每個人捐一千蚊。有人抵死地質疑：「錢唔夠點解唔叫黎生（經常『捐助』反對派的壹傳媒集團創辦人黎智英）資助，仲要向市民伸手？」更啟人疑竇嘅係，李卓人宣傳單張發出嚟個戶口所屬銀行係錯嘅，有人就回帶返李卓人此前曾「私袋」肥佬黎一事寸佢，質疑今次收咗嘅錢可又會俾佢「袋住先」，仲用佢嘅宣傳口號「背水一戰」嚟揶揄佢係「掠水一戰」。 ■香港文匯報記者 陳川
李卓人近日搞咗個所謂「一人一千蚊，踢走陳凱欣！」嘅眾籌，話佢哋嘅宣傳品「不斷被保皇派破壞」，所以需要支持者在財政上的支援，以補充更多宣傳品云云。
自己友譏獅子開大口
一咬就咁大啖，連自己友「芒向報」都睇唔過眼，形容係「關公災難」，問佢係咪收咗錢後保證做得到，「我捐一百係唔係就踢唔走？只可以捐一千蚊以下既（嘅）就慳D（啲）？......貼得多海報Banner就會贏？」
「Joey Yam」就留言質問李卓人：「踢唔走會唔會回水？」「Kon Yip Wong」亦質疑：「佢哋做議員時咁多收入，點解每次活動都要錢？」「黃鈞」亦寸佢：「錢唔夠點解唔叫黎生資助，仲要向市民伸手？」
最重要嘅係，收到嘅錢李卓人佢哋會點處理？「黃活志」就追問：「最重要既（嘅）係，如果用唔曬（晒）D（啲）捐款，咁D（啲）尾數點處理先？獨吞？」
更啟人疑竇嘅係，李卓人張宣傳單張印嘅係匯豐戶口，但實質係恒生銀行嘅賬號。有人留言有疑問，李卓人個fb管理員先至喺留言處「更正」，話係「因為櫃員機可互通，圖中寫錯了」。「Kwan Kai Yiu」揶揄：「寧願打字改銀行名都懶得出張新圖，咁以後打文字版文宣咪得囉！」
不過，有人就覺得唔單止咁簡單，質疑佢其實係「渾水摸魚」。「Wong Chi Man」就回帶返李卓人收咗黎智英畀工黨嘅捐款，然後存喺私人戶口，被傳媒踢爆時先拎返出嚟一事：「會唔會自己袋左（咗）9個月後先拎返出來？」「Tsui Wing Hing」就回帶另一單嘢：「D（啲）錢會拎去攪（搞）個罷工基金，好似海麗邨咁。」
「Min Zheng」更一次過數晒李卓人啲嘢：「一生人未做過打工仔嘅騙子，妄稱自已（己）為工人領袖，......漢奸黎50萬『黑金袋住先』喎，被踢爆後至死死氣嘔返出嚟，葵涌碼頭工人捐金，海麗邨清潔阿姐捐金，全部落晒袋了。職工盟內一家親，老婆姨仔姨媽姑姐圍威喂身居殮（斂）財要位......」
餘款唔通又「袋住先」？
「Ivan Wang」直指：「簡直係（喺）度搵水魚，你仲未交代呢次選舉所餘的款項會點處理，唔使講又係『袋住先』，你仲想有人投你票，收皮啦！」「Ka Fai Cheung」也寸爆：「原來唔係背水而係『掠水一戰』。」
九龍西其他候選人還包括陳凱欣、馮檢基、伍廸希及曾麗文。