■袁富華、鄧萃雯新劇大鬥演技，劇組「加料」慶祝奪獎。香港文匯報訊 日前勇奪金馬獎最佳男配角獎的袁富華（Ben），返港後立即為新劇趕工，夥拍鄧萃雯、林德信大鬥演技。劇組更特別「加料」慶祝袁富華奪獎，袁富華笑指已收拾心情，為新工作做準備：「一返到香港就要排舞台劇，之後咪嚟呢度開工，工作都未停過，不過係開心。雖然第一次同雯女合作，不過大家都有講有笑，已經唔記得當中的疲累。」
袁富華就話未諗加片酬，隨緣圓「主角夢」：「緣分到自然有啦，其實之前都拍了部電影做主角，不過未上映，其實一切都係等緣分到，我本身好鍾意做戲，所以有冇咩獎都唔緊要，最緊要有戲畀我做。」新劇與鄧萃雯、林德信首度合作，袁富華大讚有火花：「第一次同雯女合作，因為大家好好傾，因為我舞台劇出身，好注重排練搵火花，搵最好的演出方法。（拍完有冇得放假？）冇啊，因為我哋做舞台劇，拍完就要埋位閉關排戲，所以一直做落去。」
鄧萃雯為Ben哥送上祝福，更大讚對方專業，放心跟對方鬥戲：「因為佢係舞台劇演員，佢哋有個習慣就係會做足功課，嚟到現場見佢準備十足，所以我放心同佢夾唔同火花出嚟。」