在台慶劇《是咁的，法官閣下》中，最令觀眾注意的不是法庭戲，而是黃智賢（Ben）和王君馨（Grace）這對劇中夫婦，特別是王君馨不停大爆愛情金句，句句夭心夭肺，道出不少女人在婚姻背後的無奈，就連譚詠麟都大讚她做得好。很多人都覺得娛樂圈是一個花花世界，有很多誘惑，但同是已婚的Ben和Grace卻是這個圈的清泉，入行多年，基本上零緋聞。能獨善其身，二人道出一個重點，就是捉緊心中宗旨，不要畀其他人有機可乘。
獲外界讚劇情夠貼地不似一般法庭劇，《是咁的，法官閣下》沒令人失望，上星期劇中Ben和Grace飾演的夫妻，更於法庭爆發罵戰，Grace演的「莫希萊」告Ben演的「范小宇」非禮，犯下猥褻侵犯罪，在庭上作供時謊話連篇，語氣帶點無奈地形容他們的婚姻關係。雖然Grace表面上答非所問，供詞與案情毫無關連，但其實Grace道出自己對Ben 的感情。「以前睇新聞，見到一些分居案是閙上法庭，甚至拖好多年才離婚。以前會覺得個主角好傻，但今次演完『莫希萊』，明白其實是一種唔甘心，其中一方希望能挽回呢段婚姻。要立即簽名離婚好易，但簽咗名就冇得返轉頭。」
必盡快解決夫妻問題
Ben演大律師已經不是第一次，今次對手是熱情又開放的Grace，當中在回憶舊情時，更有不少親熱鏡頭。一段婚姻裡，時間久了，愛情會變成感情，然而當激情退卻時，要為婚姻的保鮮期延長，靠的是雙方的努力和付出，才能得以維繫。已婚的Ben和Grace更大談自己與另一半的相處之道，分享甜到漏的秘訣。說到關於婚外情的引誘，二人異口同聲地表示：「當你立定決心唔畀機會其他人，其他人根本埋唔到你身。」
Grace說：「我同老公識咗超過十年，以前我在香港，他在美國，身邊有其他男性追求我，甚至會話『君馨，你男朋友在美國，不如我哋試下一齊』，我聽完後立即blacklist 呢個男仔。好多人覺得我們呢行引誘大，但其實身處呢個花花世界，咩人，咩職業都好，你打開個心，都會遇到引誘。結婚前，我同老公去見牧師，夫妻一定要溝通，唔好估對方想點。演完劇，我透過『莫希萊』活了另一個人生，更珍惜自己的婚姻，我一定會盡快解決問題，不可等到事情不能返轉頭才出聲。」
黃智賢向妻主動報到
至於結婚超過13年、50歲的Ben現實中跟任職OL的圈外太太，自細就認識，之後拍拖14年，結婚多年依然好恩愛！閒時二人一有空就去旅行，入行29年，由在《閃電傳真機》做兒童節目主持人捱起，到今年一連三部劇都升呢做男主角，終於捱出頭，太太溫暖的家，令Ben可以全情投入演戲世界。
「我同太太認識多年，互相好信任。我會主動同佢講去邊、做咩事。咁喺呢個圈咁耐，係有試過有女生對我示好，我份人傾多兩句，知道有啲嘢，就已經落閘，例如會話『你睇下，呢條呔我老婆打的』，專登話畀對方聽，我有老婆，等對方知難而退。所以我好贊成Grace的話，如果你唔畀機會人，邊有人埋你身？咁多年，太太都好低調，佢令我義無反顧去演戲，給很大自由度，知我忙碌，不時用短訊作鼓勵。」
採訪：植毅儀
攝影：莫雪芝
場地：Townhouse
王君馨服裝：PRET-A-DRESS.COM
(Alexis Calla dress)