■蕭湘(左)接受車淑梅訪問。香港文匯報訊 「香港廣播界開山祖師」李我（我叔）太太蕭湘日前接受《舊日的足跡》節目主持車淑梅訪問，分享與李我的六十九載情。
車淑梅專訪蕭湘當日，與蕭湘到老人院探訪其丈夫。96歲的我叔雖臥在床上，竟也中氣十足大叫一聲「車姐」，令身為後輩的車淑梅非常感動。我叔於今年年初進行過手術，傷口經歷半年才復原，一直臥床不良於行，但胃口和思路依然不錯。明年九月是我叔與蕭湘結婚70周年的白金婚紀念，蕭湘姐坦言沒有準備什麼，她說：「仲記得當年我哋結婚，我啱啱20歲，喺廣州擺咗幾十圍，好多人認為李我搵到錢唔使點封禮，佢哋就夾咗五蚊，買個巨型大涼茶煲做賀禮，刻晒所有人嘅名上去，咁大個煲我一次都冇用過，真搞笑！」
蕭湘姐憶述與我叔的難忘事，笑謂我叔在追求自己的時候，專誠從香港買了一對價值200元的玻璃絲襪送給自己。她當時都不捨得穿上，每次穿着前都要滋潤雙手以免勾穿絲襪。雖說絲襪爛了是可以縫補的，但縫補的收費也很貴。蕭湘姐說當年我叔好紅，又很疏爽，身邊有好多異性朋友，她更反問主持車淑梅：「你睇我叔個樣就知道點會唔花弗？」因蕭湘姐不想一拍兩散，所以她當年也只好忍，原諒我叔。蕭湘姐更言我叔多年來從來沒有讚過她，自己則欣賞我叔的才學，兼寫得一手好字、頭腦精靈。
蕭湘姐本名何侶雲，當年要改一個藝名，因蕭湘姐身材瘦削，我叔便提議用「蕭湘」（與瀟湘一詞同音，意指瘦），結果此藝名沿用至今。談到與我叔的生活日常，蕭湘姐說我叔一直比較大使，自己亦不懂使錢之道，兩老更因股票連物業都全數變賣。蕭湘姐淡然笑說：「之前住公屋，𠵱家陪我叔入住老人院，佢耳仔唔係幾聽到，幾萬蚊一對的耳機放低就唔見咗，不過𠵱家都冇用啦。佢最鍾意問我去街幾時返嚟，我就話畀佢聽五點，但有陣去睇演唱會，食埋消夜先返嚟，佢都瞓咗啦！我好自由㗎！」
在廣播界打滾70年，蕭湘姐說賺得最多的是友誼。 蕭湘姐更謂要保持心境開朗，多做運動，日日逛街，因有健康的身體才能照顧我叔。蕭湘姐更對車淑梅說：「我叔96歲、我88歲，嚟到咁嘅年紀，唔係『呢』就係『路』，唔係鑊就係灶。見得一次就一次㗎啦！你哋有時間要搵我傾偈呀！我請！」