羅富全嘅「日日精彩」，季內初出跑直路賽，被捧成不足兩倍大熱門，可惜倒灶而回，賽後練馬師被競賽小組查詢，其中一段報告摘錄如下。「練馬師羅富全證實他曾考慮讓『日日精彩』在今仗前再一次進行試閘，但純粹是為了讓該駒汲取更多經驗，而非基於健康因素。他同樣認為今仗讓『日日精彩』獲益良多。」從上述嘅講法，該賽練馬師係冇信心贏嘅，畢竟佢希望賽前再作一課大閘以考證隻馬狀態進展，但最後冇進行，變成嗰場一千米成為熱身賽，而文中嘅獲益良多係可圈可點嘅字眼。當「日日精彩」吸收了出賽經驗後，相隔個半月有多至安排出戰第二仗，但今次係跑泥地千二米，這一次又考起大家，再追定係放棄，畢竟冇泥戰根據。但從上次拚敗復課所見，隻馬試過兩課泥地大閘，一課係由郭能試1050米，走位5 6 3，跑第一係「鑽得勁」，「日日精彩」輸四位一身位得第三名，表現未算突出，但到十一月中再試1050米泥閘，今次由利敬國考驗，走位3 4 1，起步跟喺前列內欄位置，即使沿途食泥，但轉入直路望空即竄上，結果力壓「旺舖大師」勝出此組大閘，全程睇到「日日精彩」被馬群圍困唔怕食泥。翻查隻馬喺港嘅同父兄弟馬，「飛霞」同「人民武士」都係泥地好手，「日日精彩」被羅富全安排今仗跑泥地賽，料幕後心中已有數，首戰輸過錢喺呢隻馬身上嘅朋友，今次隻馬捲土重來值得再追多次，分分鐘可以本利歸還。