前列成績騎師揀馬騎嘅情況見得多，弱勢騎師揀馬嘅情況就不太常見，即使有呢個機會，佢哋所騎必然係實力最好嘅，因為平時嘅贏馬機會已好有限，一場馬之中可以有多過一匹實力坐騎選擇，自然會好好珍惜機會。
今次第四班賽事中有場條件賽，只限三歲馬角逐，所以參與呢場賽事嘅大部分馬匹都係質新分子，角逐途程是田草千四米，沈集成隻「最合拍」，最近喺千二米由楊明綸打開勝門，贏馬過程非常精彩，喺終點前後上擒下「合衷共濟」，這系人馬似乎十分器重楊明綸，此駒再前一場，即係隻馬喺港首戰，幕後已指定由楊明綸操刀，結果喺一千米直路賽獲得第三名，以二十倍冷門賠率輸俾「龍城勝將」及「海南之星」腳下。因此在正常情況下，幕後係唔會飛起楊明綸，但今次出戰千四米條件賽，鞍上人竟係潘頓，很多人都以為係潘頓搶咗楊明綸嘅坐騎，不過細心一睇，同場之中楊明綸卻揀咗一匹輕磅馬「天地人」（圖白色綵衣）披甲。「天地人」雖然至今仍未跑入過三甲，但季內兩仗嘅表現，走勢是不俗嘅，季內初出嘅一仗，馬房安排牠跑一千米直路賽，由蘇狄雄披甲，結果只得一席第六名，輸俾頭馬「龍城勝將」四位一，該仗楊明綸就係騎第三名嘅「好合拍」上陣，翌仗「天地人」再出，隻馬俾蘇兆輝跑，呢仗係角逐千二米，只跑得第九名，輸俾頭馬「最合拍」五位一，呢仗楊明綸就係騎「最合拍」。大家可以見到，「天地人」季內所跑嘅兩仗，並非由楊明綸操刀，牠落敗嘅表現係不可作據，亦可以視呢兩場為熱身賽，今次「天地人」增程跑千四米，楊明綸棄「最合拍」而揀騎，顯然係有計。大家只要再睇呢隻馬喺港首戰嘅鞍上人係邊個，就係楊明綸，足見幕後跟呢位華將係有了一定嘅默契。