■毛姐開幕前特意準備曲奇及飲品。香港文匯報訊 毛舜筠開設的曲奇餅店昨日開張。毛姐自去年法國藍帶畢業後便全程投入研發自家曲奇，經過年幾的時間終於成功兼開舖。毛姐媽媽、家姐、細佬到場支持餅店開幕，老公區丁平更落手落腳幫餅店做裝飾。
毛姐為餅店出心出力，前晚更為翌日餅店的開張工作準備至凌晨，毛姐指有種百感交集的感覺：「突然間覺得『我啲餅面世啦！』感覺好特別！好感動，因為全部嘢都係我一手一腳搞，由每一塊餅，到呢間舖，我老公同我喺當中有幾多嘅拗撬、幾多嘅艱辛，然後今日見到自己間舖頭開張，我唔識得形容係乜嘢感覺，我唔可以話係事業，因為演藝都係我嘅事業，呢個好似係我第二個事業，我做咗一樣嘢四十幾年啦，從來未試過做第二樣嘢，而家有我嘅餅舖，係我自己親手造嘅嘢，嗰種感覺好特別，好開心、好感動。」問到同老公有什麼拗撬？毛姐就話：「譬如曲奇嘅包裝又或者舖頭嘅設計，其實我已經覺得好好，但佢永遠都覺得可以再好啲，哈哈。但如果要再做過，就趕唔切開舖，所以我會??佢，話𠵱家已經好好，我哋開咗舖先，我會keep住有餅出，到時佢就再可以有新的設計出來，呢招通常都過到骨，哈哈哈。」