香港國際賽經已圓滿結束，其中最振奮人心嘅大事，當然係第二年開倉嘅本地練馬師羅富全，憑「紅衣醒神」及「歡樂之光」兩勝一級賽，亦證明本地倉主嘅能力絕不遜色於海外任何一位，只要給予機會便能證明一切。另外，今季才獲發牌嘅丁冠豪，截至上周日已累積十九場頭馬，居練馬師榜第二位名列前矛。丁仔今季火速彈起，亦證明本地華人紅褲子真係有料到。至於環顧目前一眾副練亦不乏人才，假以時日極有機會晉升成為一倉之主，其中前練馬師伍碧權嘅公子伍鵬志，雖然本身年紀輕輕，但已於馬圈工作多年，目前擔任十屆冠軍蔡約翰的副手，年青有為日後當然有機會更進一步。另外，羅富全由上季開倉至今成績理想，剛季累積六十五場頭馬，今季成為兩勝國際賽練馬師，自然多得馬房手足群策群力，作為佢副練嘅陳志忠亦居功不少。
上周日舉行嘅香港國際賽，港隊成績驕人贏晒四場，「紅衣醒神」、應屆馬王「美麗傳承」分別衞冕香港短途錦標及香港一哩錦標，而「馬克羅斯」雖然未能再贏香港盃，亦取得一席季軍而回。至於上季香港盃亞軍「明月千里」（圖前駒），幕後一心諗住再跑呢場二千米國際一級賽，可惜上周三被發現右前腿懸韌帶內側分支活性輕微發大，並證實其懸韌帶內側分支受傷被迫退出，剛周一馬會亦宣布此匹前馬王已退役。「明月千里」已累積獎金逾五千八百萬港元，服役首季已贏出香港打吡大賽及女皇盃兩場一級大賽，翌季因傷未能參與香港國際賽，卻於季尾勝出一級賽遮打盃。查上季此駒於香港金盃一役拚至流鼻血，但上季尾遠征日本角逐二千二百米一級賽寶塚紀念賽取得亞軍。今季復出只跑兩仗，剛戰於馬會盃跑第三，可惜最終不敵傷患，要同本地馬迷提早講再見。
至於海外賽馬消息方面，除咗舉行香港國際賽，新加坡馬季亦喺剛周日結束，曾經做過七屆澳洲墨爾本冠軍練馬師，並入選當地名人堂嘅菲特文，雖然只係首次全年在星洲從練，卻猛龍過江立即登上冠軍寶座，佢憑「輕聲細語」攞到全季最後一場勝仗，全季埋單以六十七場頭馬成功封王登頂。另外，前姚本輝馬房香港馬「有得威」，自從在港退役轉往星洲訓練後亦加盟菲特文馬房，上周日首度登場角逐千二米膠沙地賽事，可惜於紐西蘭籍騎師紀斯胯下只得第六名，且看日後轉戰草地能否交出佳績。至於今季星洲冠軍騎師之爭非常激烈，兩位澳洲好手杜奕及羅達鬥得非常燦爛，結果前者全季累積七十三場頭馬，以兩場頭馬之微擊敗對手，順利蟬聯冠軍。