■劉穎鏇強調同胡㻗只是朋友。撰文：植毅儀
攝影：曾慶威
服裝：MAX&Co.
場地：The Stadium
從美國來港選港姐，劉穎鏇（Tiffany）以19歲芳齡成為2016年港姐亞軍。之後留港發展，加入《學是學非》成功入屋，吸納不少粉絲。最近於台慶劇《兄弟》中演女拳手「Zero」，為角色狂練半年西洋拳。本來星途一遍光明，早前卻同港男出身的胡㻗在車廂談心而傳出緋聞。首次面對傳媒的窮追猛打， Tiffany一度哭成淚人，近日已平復心情的她，坦承經一事長一智，以後會淡定面對。
入行2年，劉穎鏇拍了《學是學非》及《三日兩夜》土耳其篇，成功入屋。初次接拍劇集，Tiffany在最近播映的《兄弟》中飾演拳手，開拍前已接受過半年的密集式訓練。戲中以一身拳手造型現身，身形明顯較之前清減不少。早前對女拳王李松蔓一役，Tiffany慘被打到變「豬頭」，畫面充滿感染力，一班劇迷都戥她心痛，以首次拍劇來說絕對是超額完成，觀眾都對她的演技予以肯定。
「入行後，我其實一直恨拍劇，要苦等兩年才有機會，反而覺得更適合。始終自己中文唔好，呢2年我做主持多，反而訓練到我講嘢，對我拍劇來講幫助好大。自己中文是有限公司，得小學程度，入行初我都專登買咗本講中文的書，由基礎學起，希望可以幫助到之後睇劇本。因為唔太識睇中文，如果我一開始就拍劇，真係未必兼顧到咁多嘢，現在係適當時候。為了拍呢部劇，為角色花了半年時間苦練西洋拳。最初都覺得好辛苦，但近日睇返出街效果，拍得自己好有型乜都值得。《學是學非》個節目好好玩，因為我本身都好活潑好貪玩，同埋我都好鍾意科學嘢，所以呢個節目可以一路玩一路學，都幾開心。之後拍《三日兩夜》，又同江嘉敏相熟，自己成班女仔一齊玩又係好開心。」
現以工作為重
Tiffany在美國出生，雖然父母都是香港人，不過家人大多已移民美國，所以她一直都在美國生活。參選時男朋友身在美國，後來因為相隔兩地，維持不了感情，分手告終。談到早前傳跟羅天宇細佬胡㻗撻着車廂蜜會，她坦言打擊好大，強調雙方只是朋友。被問到現在單身的她可會給機會胡㻗，Tiffany表示感情事都係放埋一邊，專心事業，但當感情到來也不抗拒。
「我同胡㻗是朋友，嗰晚剛食完飯妎陲K車我返將軍澳，我們兩個係喺架車上面傾偈，點知忽然有記者下車影相，後來返上樓同家人講已經好緊急。我本身係個好介意別人點睇我，好擔心外界會以為我係個隨便的人。咁我到現在都唔明白點解可以有呢一個標籤，雖然我們兩個係喺架車上面傾偈，完全唔明白有呢一個標籤。之後屋企人同埋朋友都有安慰我，公司亦明白情況，有咗今次經驗，下次會鎮定啲，笑一笑面對唔會咁驚。我同胡㻗仍然係好朋友唔會避忌，不過拍拖的事隨緣，現在工作為重。」
感慨香港人冷漠
當初毅然放棄在美國加州大學的學位，回香港發展，可能在很多人眼中都是一種任性的行為，不過Tiffany家人對她十分支持。現在Tiffany將會繼續修讀學士學位，選擇在網上修讀degree，雖然會辛苦，但父母都好贊成。回港2年，Tiffany之前都唔太習慣香港的生活，覺得香港人很冷漠。
「返了香港2年，都未係好習慣香港的生活。香港同美國的分別是，在美國你遇到唔識的人，你對佢笑，佢都會對返你笑。但在香港，我試過禮貌地對人笑，對方對我白眼，然後擰轉面，畀人感覺都幾冷漠。屋企人都好支持我入娛樂圈，因為家人都好想我返嚟香港，因為佢地本身都係香港人，如果我自己覺得對呢一行有興趣就去做，當時唯一的條件就係一定要讀書，一定要有返個degree。其實我喺TVB已經兩年，喺工作上都有好多機會。但今年，眼見我好多同學仔已經大學畢業。所以，令到我更加有動力讀返書。之前報咗網上課程係讀埋美國嗰邊啲credit，課程其實全部都喺網上讀，即係只要一有時間隨時都讀得，咁我可以邊工作，邊讀書。雖然會辛苦啲，但父母都好贊成。」