第一場、第五班、一六五○米。暑期從李易達轉投方嘉柏馬房的「有衝勁」，七歲馬四班不足五班有餘，在港曾在田草千六及千八米贏馬而回，上季集中角逐泥地中距離，雖然未曾贏馬，但都能夠連場跑得接近；今季轉馬房初出一場後，翌仗即在田草千六米跑第二名，僅以馬頸位不敵勇馬「潮州小子」；上場轉去跑谷賽，外疊望空蝕位太多致敗；賽後試泥地大閘順利考閘成功，狀態靚得交關，今次捨草跑泥可望贏馬省招牌。
第三場、第四班、一六五○米。「好叻仔」在上手鄭俊偉馬房屢拚只能以位置交代，之後加盟蘇偉賢馬房發展，今季轉六歲終於有大器晚成之感，四戰獲一冠兩亞一殿全入前四名，前仗跑泥地一哩終於開齋，雖然只屬五班水鬥水場合，但在前中段高速下仍可快跟，末段透出越贏越遠，所以上場回升四班都跑第二，實力依然游刃有餘；今場馬少場合若用上賽相同跑法，可睇好再捷機會。
第七場、第二班、一二○○米。大摩馬房嘅昔日短途翹楚「新力風」，服役以來只跑過兩次二班賽，其餘多數出戰短途分級賽事，一六年更壓倒「幸運如意」、「友瑩格」等佳駟贏過二級賽馬會短途錦標；隨着年紀漸長實力走下坡，年屆八歲的「新力風」減夠分出戰二班賽事，形勢上已覺反客為主，今次賽前試好泥地大閘得第二名有心搏殺，分利馬有力取得久違勝利。