今晚沙田舉行季內第二次泥地夜賽，頭場開跑時間為晚上七時十五分，是次賽事並冇錦標賽。練馬師方面，徐雨石喜在泥地賽事出擊，今次戰馬不少，吼實為宜，另外方嘉柏、沈集成及文家良均派出不少惡馬，值得留意。騎師方面，田泰安、蘇兆輝及雷神之坐騎也要留神。
第一場、第五班、一六五○米。「料事如神」上賽拚後至今有兩個多月儲足體力佔盡優勢，賽前試過一課泥地閘打磨，顯然幕後亦決心打體力戰。翻看上季尾評三十三分出爭五班同程，配史卓豐排一檔且戰且走，最後僅以半馬位不敵「勇晉神駒」得第二；本身乃「金地飛客」一族，今戰只要交出一貫水準，開齋機會甚高。
第二場、第五班、一二○○米。「漸信名駒」季內長時間喺從化受訓，上次縮爭泥地千二用賴仔想食大茶飯，可惜留前鬥後殺上姍姍來遲只得第二；拚後喺沙田操了數天又再次運回從化操練，勇態持續，今次繼續對準勝途泥地千二開火，再看同場對手實力平平，屬三甲爭勝之材。
第三場、第四班、一六五○米。「好腳頭」八歲老馬今季跑過四次，第二戰角逐季內首次田泥夜馬千八，沿欄慳位衝刺爆出十二倍冷W，加分後再爭泥地一哩只跑第五，排外檔早段蝕位，表現已不太差；上次復爭千八沿途居中，惟入彎未見加速力只跑第六；現回師田夜泥地一哩，冷門可敲之。
第四場、第四班、一二○○米。「勇冠多」今季轉投丁廄後表現穩定，四戰泥地千二取得冠亞季各一，回看前仗克服不利十一檔，早段切入走二疊前列，最終不敵質新馬「繽紛遊戲」跑第二；上仗續配巫顯東，九檔起步一早守在第三位，可是入直路力追下只跑得一席第三；如果今晚場地利前領的話，擺前走可前列而回。
第五場、第四班、一二○○米。「靚加加」自上季中於賽後驗出不良於行便遭大摩放棄，並轉投文家良馬房，初期表現亦持續低迷，到今季馬兒的健康狀況變得樂觀，更安排試閘以進一步提升狀態，結果喺第二戰跑其盲門路程谷草千二殺入一席冷腳；練者食住上再報兩場泥賽跑得一亞；今次練者報回泥地千二米出師，面對如此選擇性部署，值得投下信心一票。
第六場、第三班、一八○○米。「琴心星」今季復出喺谷草一哩一出即索，直路完全無視對手存在，一鼓作氣把二三名的「快樂神駒」和「鋒芒畢露」趕過；翌仗因為賽前傷腳退出冇跑；上周三傷癒復出，可是潘頓搏殺失手竟全功；今次小方七日後匆匆入紙揀泥地千八增程出師，途程雖欠根據，惟鬥志一層百分百，要高度重視。
第七場、第二班、一二○○米。「估惑」跑泥地賽十分耍家，過去六次角逐泥地千二及一哩，合共交出兩冠四亞成績，從未失掉頭兩名，演出準得交關，而上場出戰田草千四米，廿七倍冷門在祈普敦胯下後上也追得一席接近嘅第五，足證其近況正值勇點；今次回師泥地千二強項馬勇路合，再看上仗拚後運回從化受訓兼試閘，狀態對辦，憑本身銳利前速擺前領放，當有力衝擊季內第二W。
第八場、第三班、一二○○米。「真好漢」（圖5號）雖然已有一段日子未有頭馬交出，但翻看對上兩次贏此程水準卻相當高，分別是擊敗「仁愛之星」及「雲信凡高」等駒，可見只要牠跑出水準，威力的確非同小可；再看剛賽同程，僅後追不及以頸位敗給「冰糖葫蘆」；賽後備戰未見放緩，今月初再試一課泥閘，沿途放頭順走而返，姿態輕鬆，再臨有權補中。