今次泥地夜賽，唔少精於部署泥地戰嘅馬房大家應該優先留意，其中一個就係徐雨石馬房，今次仲搵埋隻去過韓國跑沙地一級賽嘅「藍天堡馬」（圖13號）上陣，咁大堆頭，當然要吼實徐廄參戰馬。先講個消息俾大家聽，就係上周日跑完比賽後，徐雨石立刻坐飛機遠赴澳洲幫啲老細入貨，所以周一排位嗰日妐g已唔喺香港，不過，據馬房班手足講，佢日日都有電話到，實行遙控落柯打備戰，好似周一咁，副練經已接到阿頭安排，將四隻戰馬分兩組，早上喺馬房地堂踱步，中午再去機坪踱，期間要一位馬房騎馬人用手機將踱步情況拍攝低，稍後時間傳俾阿頭睇，呢四隻戰馬分別係「藍天堡馬」拍「有利高」一組，另外「佳運來」及「愛飛一號」一組，前兩隻馬由助手踱，後兩駒則分別由副練及黃皓楠踱，單睇倉主要馬房工作人員將踱步過程錄低，便知徐雨石對今次夜戰是抱有一定希望。
先講隻「藍天堡馬」，九月初遠征韓國後，返嚟香港先安排跑場草地千四米回一回氣，近期才重新打磨，十一月底安排由梁家俊彈課千二米泥地大閘，即展現泥地王本色，走位3 2 1，末段一衝即過「好吉利」，而且仲半收韁贏一個馬位返嚟；今次返主場跑泥地賽，相信普通舊馬應該唔係佢嗰皮。
有利高磅輕勝望濃
另外隻「有利高」，上場四班泥地千二鍊輸俾隻「日日精彩」，如果從事後睇，隻「日日精彩」咁大件，泥地性能亦非常出色，上三班都有得揮，今次「有利高」升上三班跑泥地千二米，質素稍稍唔夠人咁勁，不過搵個潘明輝上去只孭一一五磅，同掛頭牌嗰幾隻馬相比輕十幾磅，大家負磅懸殊下，配合本身主動跑法有機會一放而回。
愛飛一號輪到擔正
另一對「佳運來」與「愛飛一號」，「愛飛一號」倉主要指定黃皓楠於下午加課，加強人馬溝通，呢隻馬上場泥地千二米輸俾隻大超班馬「快樂旅遊」，今次計數輪都輪到佢威，呢隻馬與黃皓楠夾過兩次，其中一次輸頸位得第四名，希望今次可以幫匹馬打開勝門。至於隻「佳運來」，倉主多數指定要由副練踱步，呢隻馬曾經在泥地一哩得亞軍，與「烽煙四喜」串Q，本身泥地性能都唔錯，隨時可以跑出彩虹。
梅姐拍攝西域猴王
大摩上周日起個孖寶，最開心當然係潘頓，一日贏夠五場，締造在港九百W，至於「標準猴王」個馬主亦好開心，呢隻名氣馬終於可以贏得季內第二W，因為上場郭能唔能夠立刻連捷，幕後俾大家嘅壓力亦都好大，今次夜賽同主「西域猴王」亦等住交代，不過宜家仲尋求緊最佳出路。今次出戰泥地，梅姐一樣咁緊張，周一下午約定蔡明紹返倉，要佢親自替隻馬踱步，梅姐就拍低踱步過程，可能稍後時間與大摩一齊研究點樣跑呢隻馬。而「西域猴王」踱步期間，馬房多派廄侶「軍力勁」伴踱，後者非常好火，扯到鞍上人死咁滯，呢兩隻馬牌面雖然唔算太起眼，但如果追開大摩倉，就不妨視為半冷門一敲，隨時有意外驚喜。