羅富全國際賽雙喜臨門之後，馬房立刻喺周一還神，倉主訂咗四隻大金豬，仲有好多生果同飲品，喺拜完神之後俾員工享用，由於呢個儀式屬倉內手足圍內嘅事，所以冇請馬主。當然，倉主還神係多謝幸運之神嘅眷顧，期間仲希望下半季賽事能一帆風順增添好成績。果然，周一還完神，周三又再憑田泰安「好腳頭」贏馬，呢場頭馬更令倉主甜入心。事關「好腳頭」個名真係好意頭，上季由鄭廄加盟後，除馬匹有頭馬進帳外，馬房事業亦一帆風順。今季初「好腳頭」倉主經已拿拿臨同隻馬把握機會，先交出一場頭馬，估唔到相隔兩仗，又贏第二場頭馬，幕後大讚羅富全練得好之餘，倉主亦回敬番對方一頂高帽，話隻馬改個名改得好。
跑完國際賽，香港馬圈另一個高潮位就係打吡大賽，羅富全得洪祖杭先生支持，今季引入昆士蘭打吡冠軍「達龍駒」（圖3號），上場初出跑千六米得第三，賽後被加一分，現時得九十二分，即使以呢個分數，已有入選跑打吡資格，不過，無論如何，羅富全獲得練呢匹昆士蘭打吡冠軍，又點會咁失禮，一場都贏唔到而進入最後決賽跑打吡。所以，現時倉主最大期望就係替「達龍駒」贏馬，如果評分達一百分左右，基本上經已攞梗一票入場券。上場「達龍駒」贏唔到只得第三名，輸俾「翠龍」同「百獸王」，本身表現經已唔失禮，一來千六米對「達龍駒」嚟講嫌短多少，二來呢場千六米早段係慢步速賽事，大家可以見到由第一名「翠龍」數到第七名「志趣相投」，七匹馬齊齊衝刺僅相距四分三個身位，「達龍駒」可以入位置，經已證明身價。今次馬房安排「達龍駒」跑二千米，路程最合腳法，馬房為求穩陣起見，出埋洪祖杭公子隻「火箭駒」當開路先鋒，乜嘢步速羅富全屆時都可以由自己馬匹掌控。