剛周三夜泥宴雷神連中三元並替蔡廄起孖，事實上雷神今次以蔡廄主帥身分重臨香港，由於策騎條件受到限制，再唔能夠好似以前咁，四處搵實力坐騎，因為同場必須要蔡廄冇馬列陣，又或者用本地薑減磅先至可以外借，因為限制條件多多，所以唔係好多大馬房愛用。雷神以前係公司騎師，有大馬房一日內搵佢騎三幾隻馬，但現今麻煩多多，所以寧願搵其他騎師。雷神回歸，除蔡廄以外，甚少贏外線馬，即使周三連中三元，其中隻外線馬「萬霸駒」，只係出自蘇保羅馬房，目前環境，雷神要爭氣唯有盡量將手頭上一批蔡廄馬跑好，用成績證明一切。夜賽連中三元成績中，有兩匹馬係來自蔡廄，一匹「激賞」，另外一匹係「精算閃擊」，相信唔少雷神擁躉都有捧場，不過估唔到呢兩隻舊馬，贏馬姿態如大超班，一群原班對手根本難以匹敵，一般而言蔡廄戰馬踏入國際賽期間，都係出擊時期，一直維持到尾爭冠軍，正如今次日賽，大家見到蔡廄出動一啲面口生疏嘅質新分子，如「夏威夷」、「平海飛星」及「弛曜風」等，呢一批馬，每隻都有本錢替馬房喺季內增添頭馬。其中「弛曜風」上場初出跑谷草千二米，配祈普敦上陣，排十一檔爆入一席冷腳，露光走勢證明四班必屬超級，今次配上雷神跑田草千二米，直路夠長可盡展所長，而馬主霍玉堂，以前曾養過「泰山」喺蔡插A隻馬係一出即勝，顯示幕後係一位急進嘅馬主，料「弛曜風」今次可順利補中。