近日馬圈有不少話題，好似早前馬會借上月尾補賽，順道慶祝沙田馬場四十周年，馬迷對沙田馬場必定各有難忘回憶，攪多啲呢類慶祝活動值得支持。不過，賽事期間先有「棗棗幸運」出跑道瞓低繼續獲准出賽，再有潘頓騎「我願意」直路滋油演出，唔少馬迷已經谷到一肚氣。相信馬迷都知潘頓手鞭有幾勁，偏偏佢騎「我願意」就慢條斯理，舉起支鞭遲遲唔打，當好多評馬人一跑完已經喺直播節目中嘩嘩聲，直接質疑若潘頓發揮正常，「我願意」應該係入Q而唔係第三。騎師點跑馬迷有眼睇，馬迷亦關心馬會競賽小組點樣跟進，可惜賽後報告對「我願意」嘅末段騎法隻字不提，小組亦冇召潘頓問吓。小組無動於衷，連騎師都唔使問，網上即時已經有好多馬迷對小組嘅處理手法非常不滿。
記得前兩季潘頓騎「文藝學家」，小組裁決受到嚴重質疑，小組當時就開記者會公開解畫，就算今次傳媒無問，都應該主動出嚟解釋小組觀點，向傳媒交代點解冇跟進「我願意」末段騎法，同點解小組連問話都冇問。就算賽事當日係小組一時睇漏眼都唔緊要，小組有權事後跟進補飛，傳召騎練進行研訊。
香港馬圈一向都係弱肉強食，騎師競爭大，幾個前領外籍大師傅唔憂冇馬騎，仲不時有馬任揀。以前就話華人騎師欠缺支持，家陣騎功較次嘅外籍騎師更加難撈，隨時搵唔到馬跑自動停賽，今季祈普敦同麥偉利成績同支持都欠奉，佢哋嘅半季客串牌照二月中到期，下半季有冇得續牌仲係疑問。騎功更好嘅騎師如果冇練馬師同馬主支持，真係俾你識飛都冇用。無可否認，祈普敦同麥偉利騎功唔係標青的一群，今季分別暫時贏得四場同兩場，位處騎師榜的下游位置，某程度已反映練馬師同馬主對佢哋陣上搏殺冇信心，情願俾多啲機會更加硬淨嘅華將同牌仔減磅好過。
南非麥偉利始終係首次長駐香港嘅新騎師，唔夠支持都唔難理解，來自澳洲祈普敦嘅情況就較為奇怪，其實前季首度長駐香港埋單贏四十場頭馬，得到大摩馬房大力支持，唔知點解上季開始成績下滑，陣上表現飄忽難測，本來今季初蔡神仙都有好多馬交俾祈仔騎，但只靠「估惑」同「旺蝦王」贏得兩場，主要功能似乎係操馬同熱身減分，家陣雷神做埋蔡約翰馬房主帥，連一個最大的靠山都冇埋，可知前景都幾暗淡。馬會發牌小組今季肯改善，減少全季公司騎師數目，兼發多咗半季公司騎師牌照，目的就係鼓勵騎師以表現爭取續牌，呢個政策方向正確，亦應該延續落去，若祈普敦同麥偉利喺約滿前繼續冇支持冇成績，就應該冇得再留低，情願繼續嘗試向外招攬其他新騎師也。