■Dear Jane揀選相片送給親友。香港文匯報訊（記者 梁靜儀）成軍16年的樂隊Dear Jane，將於3月16日至17日首度踏上紅館舉行《Dear Jane Yours Sincerely Live 2019》演唱會。昨日四子出席於尖沙咀的記者會， 台上四子擺出海報上的甫士外，又揀選相片送給親友，其中主音阿Tim揀了第二次在九展開騷，老婆楊洛婷送花兼咀嘴的相片，他笑言錫完這一啖，之後就生了女兒，所以相片是送給女兒， 讓她知道相片中的兩人正是父母 ，之後四子更獲唱片公司高層送上靚酒。
出道多年才踏上紅館開個唱，問到是否等到頸長？Tim說：「都係見步行步，初時都係錄起啲歌出唱片，冇諗過他朝喺咩場開演唱會。」他們又重提舊事，指在2011年簽華納後在馬場開首個騷，台下只得3個觀眾的瘀事。問到當時可有喊？Howie坦言感覺好難受，並大爆被唱片公司同事埋怨：「之後公司又幫我哋搞騷，一星期只賣得7張飛，畀同事鬧，可以行到呢個位（紅館開個唱），呢啲記一世。」今次只開兩場，Howie直言不夠喉，因優先訂票在兩小時內已售罄。
Tim透露個唱上會玩火，將紅館變成火舞間。 問到屆時可以要着多條防火褲？他笑說：「 咁咪幾個消防員喺台？（危險？）一定安全。」Howie表示會買重保險。至於嘉賓方面，Tim 透露會有男有女，都是合作過的人。他上一次開騷太太吻完他之後就生了個女，今次開騷會唔會又生多個？他笑說：「又得。」