苗禮德每年聖誕期間都會返南非度假，一直去到新年先至會返港，而苗禮德回防後，經已連續三期有頭馬進帳，先係上周三贏「龍城勝將」，接住周日又贏「烽煙四喜」，到剛過去嘅夜賽，又憑「常拼常勝」爆冷贏馬，講手風踏入二○一九年呢個倉都算唔錯。咁周日十場賽事，苗禮德馬房又是否能夠保持勝勢，繼續有頭馬進帳，呢個答案，雖然暫時仲未知，但經已有匹叫糊馬，此乃出戰第一場四班千四米嘅「龍騰摘星」。
「龍騰摘星」大前一仗由史卓豐贏谷草千二米開齋，再出依然跑同程，但因為後上姍姍來遲，只追得一席第二名，賽後史卓豐更被小組查詢跑法，最後鞍上人建議此駒要增程跑，不過，倉主卻沒有理會史卓豐嘅建議，繼續再安排跑谷草千二米，並飛起史卓豐換上蘇兆輝，最後只能跑得一席第三名，演出比起史卓豐嘅兩戰仲差。而嗰場由蘇兆輝所跑嘅谷草千二米，距現今再度出賽之期，經已係一個多月前嘅事，馬房相隔個多月，終於肯安排隻馬加程。事實上，馬房的確是作出過取捨，上次賽後經已決心安排跑較長嘅路程拚個明白，假如倉主誓要安排呢隻馬跑谷草千二米，剛過去嘅周三夜賽，四班係有一場谷草千二米紀利華木球會盃，即係由「四千金」所贏嘅一仗，但「龍騰摘星」沒有出戰，專登留待今仗先至披甲，顯然早已成竹在胸。
另一方面，倉主亦係一早擬好咗呢場出擊嘅計劃，因為馬主經已知道上場谷草千二米落敗後，倉主呢次會安排隻馬報跑田草千四米，由於馬房一早定咗目標，因此連蘇兆輝亦一早卜定，騎練有了默契，避免到時先至搵適合人選，因此，「龍騰摘星」跑今仗係馬房個多月前嘅部署，如此細心相信苗禮德此匹延續勝勢馬，屆時依然好大機會替馬房贏馬威威。