呢次周日賽事有兩項一級賽舉行，分別係百週年紀念短途盃跑千二米及董事盃跑千六米，後一項有馬王「美麗傳承」列陣，季內四出四捷，十二月份仲贏埋香港一哩錦標，跑平磅真係搵鬼同佢鍊，呢隻董事盃應係囊中物。反而倒有興趣研究一下今屆百週年紀念短途盃邊隻會問鼎，焦點相信會是新鮮出爐香港短途錦標冠軍「紅衣醒神」，呢隻馬過咗羅富全度，有番晒喺蔡約翰時期嘅風采，呢次出戰百週年紀念短途盃，同場勁敵「翩翩」及「爭分奪秒」都係其蹄下敗將，按理真係冇得跑，不過，蔡約翰訓練得出嚟嘅馬，未走下坡前係值得憧憬，但一見有下滑跡象就千祈咪再眷戀昔日戰績，最佳例子就係「天下為攻」。講番今場「紅衣醒神」最大勁敵就係前廄侶「翩翩」及「爭分奪秒」，兩駒埋門均由主帥莫雷拉親自彈過泥閘，前者得第二名，後者在另一課泥閘跑第一名，最終雷神揀騎「爭分奪秒」，可能係情意結，事關呢隻馬在港跑過十七戰，全部入晒三甲，其中十五場係由雷神操刀，呢十五場包括首戰，直到上季佢唔做公司騎師為止。今季「爭分奪秒」跑過兩仗，雖然由其他騎師披甲，卻一樣上名，點解雷神冇再揀佢跑，皆因呢兩仗佢騎咗「旺蝦王」，分身不暇先至由其他騎師代勞，但隻馬一樣表現忠心。所以假如話「紅衣醒神」今仗有力再贏，另一方面也深信「爭分奪秒」在雷神胯下是揸住第二名最低成績向「紅衣醒神」作出挑戰。