■蔡卓妍趁住年輕好狀態去「雪卵」，將來幾時生B做媽咪都沒問題。蔡卓妍（阿Sa）在新作《非分熟女》中，演有性障礙的「小敏」，不單有自慰戲，更與台灣影帝吳慷仁有超激大膽的性愛鏡頭，有外間評論為阿Sa「從影以來最突破」的作品，更盛讚阿Sa演技更上一層樓。現實中，阿Sa首認當年因衝動同鄭中基結婚，現在同男友石恆聰感情穩定，仍未有打算結婚，但就會仿效其他女藝人去「雪卵」，玩到夠先才做媽媽。雖然未有計劃做媽媽，但阿Sa仍有喜事要公佈，就是來緊親生「BB」出世，會推出自家品牌面膜。
初看《非分熟女》電影，很嘩然，沒想到蔡卓妍會有如此大膽的演出，比2015年的《雛妓》有更激的戲份。特別是和吳慷仁在餐廳廚房激戰一幕，令人熱血沸騰。對於此幕，阿Sa即大吐苦水，表示廚房塊鋼板十分冰冷，但廚房的氣溫就好熱，其實幾難頂。
「之前已經同導演曾翠珊及攝影師去睇位，務求拍的時候一Take過。喺鏡頭前面睇，兩個好似好自娛，但其實好辛苦。拍的時候嗰塊板凍冰冰，好硬，我對腳又唔可以伸直，廚房又熱，都幾難受。跟住現場仲有十幾個人，喺心態上要高度集中，如果唔集中，好可能就要NG，好彩我們呢場一Take過。你們現在見到我好像是全裸演出，事實上找來《肉蒲團》個服裝師來幫手，包咗好多層嘢硬晒，對手摸同自己都冇晒感覺。本來初同導演傾劇本，佢真係叫我好似荷里活女星咁全裸演出。咁我當然Say No啦，我真係面對唔到鄉親父老，自己接受唔到，現在大家睇到的尺度已經係極限！」
華哥教唔好輸給自己
從2015年開始，阿Sa在電影上的作品愈來愈成熟，更憑電影《雛妓》的破格演出，獲提名金像獎影后。外界認為阿Sa因拍《雛妓》令演技大躍進，她亦承認這套戲令她開竅。問到阿Sa是否已拋開偶像的包袱，她坦言現在接戲的心態是唔好畀好大壓力自己去工作。
「我覺得自己呢幾年係心態唔同咗，係好舒服的狀態工作。像今次演小敏，個角色好壓抑，工作上、感情上都找不到出口，其實好多香港人都生活好壓抑。我同導演傾劇本時，佢都叫我演一個同我自己相反的人，對於我來講唔係太大難度，只要想像我平時唔會咁樣。當然，你們亦可能覺得阿Sa根本唔使拍呢種戲，做呢行好多時會成日介意別人點睇自己，但係華哥（任達華）都同我講過『我拍過很多部戲，很多戲都不好，最緊要唔好輸給自己。』就算好似去年1年內拍4套電影1個劇集，一樣覺得好享受。5個角色都係完全唔同，有反差仲好大，能夠完成晒係個好大挑戰。」
若再婚要白頭到老
阿Sa和前夫鄭中基在2010年被踢爆二人早於2006年在美國洛杉磯秘婚，可惜婚姻只維持4年。之後阿Sa同同門師弟陳偉霆拍拖，至2015年分手。2017年6月，阿Sa被傳媒拍到在麻雀館太子爺石恆聰(Anthony)的3億大宅兩度過夜，難得阿Sa大方認戀。剛過去一年，阿Sa公司喜事重重，好姊妹周勵淇、鍾欣潼先後出嫁。而阿Sa同石恆聰熱戀快兩年，可有衝動再婚？誰知阿Sa一聽「衝動」一詞即耍手兼擰頭，直言「衝動」過一次已經足夠。
「上一次自己試過衝動地去做，所以我現在會更加覺得，婚姻真係一個承諾。呢個承諾係包含好多嘢，唔係話𠵱家好開心，兩個人我愛你你愛我，就去做一樣嘢，有好多嘢要砌好晒先，我覺得一定要計劃好先可以行呢一步，希望以後都開心，白頭到老。暫時處於我好開心，佢好開心，大家相處好舒服的狀態。之前阿嬌，現在想起都好有老懷安慰的感覺。至於生BB，暫時未有打算。趁現在在公司有少少地位，10 幾年沒玩過，現在有些少時間當然要盡情玩，所以打算去『雪卵』，幾時生BB都得。不過今年我真係有個親生『BB』出世，就是會推出個人品牌面膜。」
■採訪：植毅儀 攝影：彭子文 髮型：Jove Shek@La Mod Salon 化妝：Yannes Lee@Ndnco 場地：英皇駿景酒店 服裝：top: Adeam, pants: Monse, shoes: Giuseppe Zannoti, styled by Derek Ho 服裝：top: Adeam, pants: Monse, shoes: Giuseppe Zannoti, styled by Derek Ho