第二場、第五班、一六五○米。「好運齊來」在上手大摩馬房時合共跑過八戰，從未上名之餘，最叻一次都只係跑第六名，之後暑期便加盟沈集成馬房發展，今季開鑼日初出田草千六米已跑第四，表現煥然一新，之後雖然轉來谷草一哩又搵到出路，大前仗就配見習生黃俊在同程放入第二，僅以頭位之微不敵「勁勇威龍」，後駒勝完可以再勝，賽績水準絕對可信；之後轉場首次跑泥地，既走三疊蝕位，賽後又驗出氣管多血，大敗而回當然不能作準；上次重返谷草沿途放得甚快，終點前力弱之下只得第四名；今次只要留放尺寸好一點，進而坐正絕不奇。
第五場、第三班、一八○○米。「廣才」兩歲時贏過草地千五米，在英國跑平地賽大勝十五個馬位，鏡頭認真少見，質素肯定唔簡單，來港編七十四分有着數。上季在港初出跑千四米，頭兩段比標準時間慢，形勢不利後追，牠在直路竟能夠從尾二追上，只輸一馬位跑第三，末段造廿二秒四五全場最快，在陣上展示高強實力；上場季內第三戰，轉方廄初出跑田草千六米，在潘頓胯下跑第三名；復課悉心操好今次轉來谷草上陣，可贏馬省招牌。