■家燕姐去年成功開騷，但都經歷過多次入紙不果。香港文匯報訊 個個歌手都想開紅館騷，但奈何要成功入紙紅館開騷「並唔係咁容易」，就連業內人士都唔知紅館方面由咩小組投票決定批期，亦唔知小組成員由何人組成。
香港出生的李玟，一直想在紅館開騷，因為紅館對她很有意義。汪明荃早於2016年時曾投訴，自己想開個人騷申請了10年也沒有期，每次都是演出別人的騷﹗65歲的鍾鎮濤，過去幾乎每年都會申請紅館開騷，由55歲開始，等足十年，去年終於有機會。 就連去年開騷的薛家燕想開紅館騷都要叫後輩讓路，還有其他例子多不勝數。就連劉德華早前宣佈入紙申請2019年底紅館檔期，可惜也宣佈申請紅館檔期失敗。每位歌手都話要「爭期」，到底點先可以「成功爭取」？當中又有乜準則呢？香港文匯報訪問了唱片公司高層，結論是：「沒準則的，亦都唔知邊個決定呢件事，所以個個都去爭！」
大公司有經驗成數高
其實早前華仔申請年尾紅館檔期失敗，不少業內人士都感到嘩然。始終紅館批期都有商業考慮，原本以為「劉天王」個名夠響，點知被否決。唱片公司高層更透露其實紅館批期只考慮1年內的時間。
「歌手如想申請紅館期，要一年前入紙申請，例如申請2020年4月的期，就要2019年3月去入表及畀訂金，大約2個月內就會知道結果。因為紅館計分成，係盤生意，紅館方面都會知道邊啲人開演唱會係得，有邊啲人唔得，你有權可以蝕到開唔成。如果你是歌手，開了ABC公司去申請檔期，又會唔批，因為要睇公司背景，所以好多歌手要同大公司一起做。好似耀榮、東亞、英皇等等。至於點解年年都話爭場爭崩頭，因為個個都入紙申請開騷，反正當你真係申請到，最後計唔掂數又開唔成，都係蝕幾萬蚊。」唱片公司高層又透露，其實歌手就算話開一場演唱會，前後要BOOK4日場，所以好多歌手都BOOK多日場，方便到時就加場。