■莊思明表示平時會鑽研影相技巧。香港文匯報訊 莊思明（Lisa）、安俊豪、可嵐、趙哲妤、岑潔儀等昨日現身荔枝角為洗車舖擔任剪綵嘉賓，席間Lisa化身「洗車女郎」幫靚車打蠟，受訪時問到私下可會同男友楊明一齊洗車？她笑說好少，「自己是要用到好污糟先洗車，男朋友就定時定候洗車，自己都有講過幫佢手洗車，不過佢唔畀。」記者笑言是否楊明唔畀掂佢「老婆」？Lisa說：「佢都會畀我揸嘅，互相做柴可夫司機。」
講到早前同家姐莊思敏、男友等人去泰國旅行，Lisa為幫眾人影靚相，不惜踎低搵靚角度，其中負責影花絮的楊明，返港出席活動時大呻被Lisa鬧影相麻麻，Lisa聞言冇好氣話：「就係影唔到靚相，咪影花絮，我想影啲好靚、好有意義嘅相嚟Post，但佢好似唔明我講咩，畀埋Sample佢都影唔到，仲話冇分別！不過佢都好聽教、易教。（家姐影得好啲定男友？）咁就楊明，家姐會將我影到好矮，高人影到咁都好難！」
問到平時可有鑽研影相技巧？Lisa表示都會參考其他人點影相。問到可會同男友影相集？她指：「都冇諗住。（有冇諗定結婚相？）都係出埠影。（幾時？）唔知，儲吓錢先，唔使錢影㗎？等我呼籲吓先，哈哈！」