告東尼搵莫雷拉搏「美麗」系馬，呢類情況唔多見，但上周「美麗精神」用雷神贏馬，鞍上人嘅表現可謂演出功架，因隻馬要負頂磅兼排最外檔，但最終險勝「勁有波幅」。「美麗」系馬一向支持潘頓，尤其係告東尼及大摩養嘅「美麗」系，呢次被莫雷拉喺告東尼馬房執到死雞，日後難保這系馬會跟雷神加強合作，因此，日後潘頓對「美麗」系馬嘅選擇同拚搏，肯定會更重視同搏命，以求穩定幕後人嘅信任。正如今次大摩出三隻「美麗」系馬，「健康美麗」、「美麗經典」同「美麗動力」，上述三隻馬，潘頓都有優先選擇權，結果佢只揀咗跑第八場第三班一哩嘅「健康美麗」，另外兩匹「美麗」系則由潘明輝執韁，相信呢回潘頓嘅選擇亦唔會再將肥水流入別人田。「健康美麗」上次經已由潘頓騎過，只得一席梗頸四，沿途走位過程，可以謂蝕盡形勢嚟跑，本來排二檔嘅「健康美麗」，在排檔方面係佔到優勢，但同場另一匹排喺四檔嘅「小米周」，呢次鞍上人利敬國非常醒目，一早撻起「小米周」前速，全程霸住條欄均速領放，末段更能賈其餘勇，力拒「萬利高」及「情趣」衝刺而獲勝，至於形勢唔算好嘅「健康美麗」，全程被群駒迫出三疊走，入到直路鬥衝，拉士後勁並非太強下只能屈居第四名。潘頓汲取咗上次經驗，今次再騎「健康美麗」當然心裡有數知道如何發揮，相信三匹大摩「美麗」系馬，要贏嘅話，呢隻「健康美麗」係最有冠軍相。