上個禮拜六從化搞速度示範賽，請晒港穗高官出席，非常熱鬧，雖然只跑五場示範賽，但每一個環節，好似香港跑馬咁，絕冇馬虎，贏出嘅頭馬、得勝嘅馬主仲喺凱旋門影頭馬相。喺未開賽前，從化天氣真係唔同香港，香港中午二、三十度，整日都會唔差多氣溫，但從化前一日二、三十度，到跑當日，天陰落雨，即時驟降十幾度，即係得番一半溫度，有經驗北上嘅馬經工作者，有部分自備御寒衣物，否則好容易得病。喺示範賽開始前，有四位華籍練馬師相當識做，去到傳媒室，先向各地傳媒打個招呼，呢四位華籍練馬師，包括有丁冠豪、沈集成、容天鵬及鄭俊偉，結果上述四位練馬師，除容天鵬冇馬贏外，其餘三位都有進帳，沈集成贏「力奇先鋒」、丁冠豪贏「龍騰馬躍」，仲有鄭俊偉贏「其樂無窮」，呢次示範賽，除咗對香港馬會意義重大外，其實對鄭俊偉來講更係救命賽，因為呢日頭馬計算喺練馬師成績單上，現時鄭俊偉已贏得十場頭馬，下半季賽事再贏六場就達標，相信對呢個馬房係個好大嘅鼓舞。
今次夜賽，鄭廄只派兩駒出戰，分別係「劍聶風」同「樂滿家」，前者配潘頓，後駒就用田泰安，搵得前列大師傅必然想搏命，尤其請得郁潘頓所騎嘅「劍聶風」，今次跑第二場四班一哩，大家不妨留神。過往「劍聶風」養喺告東尼馬房時，曾喺三班贏谷草一哩，蹄下敗將係「慣勝共贏」等強手，之後又輸俾「文藝學家」等惡馬而入圍，後因跑咗場不合腳法嘅泥地一哩，最後不良於行，倉主跟幕後商量過，將隻馬轉馬房調理好健康及評分調整後就有再贏嘅機會，所以今季加盟鄭俊偉馬房，近兩仗可落四班作賽，開始有番接近走勢，難怪潘頓獲幕後邀請立即答允，睇嚟呢隻馬有機會替馬房增添頭馬紀錄，進一步走近達標之數。