上周日第七場國際二級賽主席錦標，相信馬迷都會關注馬王「美麗傳承」可唔可以成為另一匹一季七捷馬，隻馬早前已成為國際評分最高嘅一哩賽駒，距離上次出賽接近兩個月有足夠休息，同場對手最多都係受讓五磅，果然在潘頓正常發揮下輕輕鬆鬆又執一場，兼且追平一項香港紀錄，事關香港賽馬史上只得「盈彩繽紛」及「雄心威龍」試過一季七捷，另一方面，「美麗傳承」亦向退役廄侶「爆冷」獎金紀錄進發，牠只要在下仗冠軍一哩賽獲勝的話，便可超越前「爆冷」累積獎金的紀錄（$83,197,500）。
「美麗傳承」季尾點樣部署已經係眾所周知嘅事，下個目標自然係月尾場國際一級賽冠軍一哩賽，如果一切順利的話，「美麗傳承」應該就會衝出香港，遠征日本挑戰安田紀念賽。事實確係有唔少馬迷覺得「美麗傳承」唔應該死守香港，家陣大部份人都望佢順利贏晒本地一哩大賽，再遠征引證實力。大摩喺「美麗傳承」贏完國際賽香港一哩錦標後，已公開講有意安排「美麗傳承」出戰杜拜世界盃賽日，但當時馬主另有諗法，唔係咁急冒險俾隻馬遠征。據知，近排幕後好認真打探有關去跑安田嘅資料，再唔係好似遠征杜拜咁有保留，馬主喺日前慶功宴亦親口證實咗籌備遠征嘅計劃。澳洲馬后「雲絲仙子」不斷刷新連勝紀錄，但無論點樣延續長勝，始終都係留喺澳洲本土，冇出去同頂尖世界各地馬匹交過手，係咪真係全球最佳就永遠得唔到證明。「美麗傳承」現階段喺香港跑一哩應該都難尋對手，但匹馬目前已經六歲，下季未必仲維持到巔峰競賽狀態，呢個時候遠征可以話最佳時機，難得幕後亦當機立斷，應做就去做。話分兩頭，已經有一段長時間冇見香港馬揚威海外高水平賽事，近年遠征新加坡同韓國贏馬固然值得高興，但係賽事水平始終唔及喺杜拜、英國或者日本咁貨真價實。若「美麗傳承」跑得成日本安田的話，應該有唔少馬迷睇直播下注支持，甚至親身到當地打氣。
另一方面，對比起騎師，練馬師角色看似風險較低，但收入一樣豐厚，不過出色的練馬師在這個世上是可遇不可求。如何部署出賽、如何令一匹馬心境保持長期開朗處作戰狀態（可能三五七年），當然還包括減少令馬兒因傷病發生而被迫縮短競賽壽命等等，另一類是如何在名練手上接收一匹馬從而令牠更上一層樓。華禮納訓練「雲絲仙子」32連勝，馬后本身的確勁，但要由三歲保持到七歲，當中又無病無痛，每季按足時間表上陣，談何容易？香港練馬師不多，像蔡約翰、大摩及告東尼等屹立不倒，正是他們經得起上述各項考驗。