■李慧玲，何棄療?fb截圖「飯民」呢排屢戰屢敗，佢哋靠「精神勝利法」自我安慰本來都係無可厚非嘅，不過過晒火位就唔怪得人哋指住嚟恥笑喇。話說「佔中九男女」入罪之後，反對派網台「D100」搞咗個「黃着行動」，呼籲自己友着黃色衣物或者飾物，當係撐住黃傘支持「九男女」。早幾晚天文台發出黃色暴雨警告，「D100」主持大口玲（李慧玲）就覺得天降異象，喺facebook爆出一句「連個天都撐『黃着行動』」。
大口玲假假哋都係一個資深傳媒人，呢句咁無經過大腦嘅說話，就聽到唔少網民打咗個突，然後打咗一大堆留言恥笑佢。「Vito Ho」突破盲腸，留意到交通燈都有黃燈，「連交通燈都撐『黃着行動』。」
唱《藍雨》係咪「藍絲」先？
可能係油麻地居民嘅「Smj Lau」就話：「痴（黐）×線！成個果欄咁多黃色生果，又係撐『黃着行動』？忽上腦。」「Leung Tak Man」似乎好熱氣：「其實每次屙尿都係撐『黃着行動』！」「Alex Cheung」就連「歌神」都擺上枱：「張學友唱《藍雨》，咁佢係咪『藍絲』？」
「梁敏耀」無佢咁好氣：「只要有嘢係黃色，就被大口玲當係支持她所謂『黃着行動』，滿腦子都是黃色思想。」「TySon Cheng」覺得「飯民」都有樣嘢叻嘅：「精神自慰既（嘅）第九重天，武林第一！」
「無敵神駒」仇思達亦都湊下熱鬧，當然唔少得向都係用黃色做主調嘅「熱狗」抽水：「嘩，咁（過氣『熱狗』首領）黃洋達咪變相向『佔中九子』致謝咗幾年？」佢益友兼「香港文匯報忠實讀者」JoJo Wu就好驚青：「仆×，唔小心揩咗啲芥辣喺件衫度，會唔會俾人以為我撐『黃着行動』？」
■香港文匯報記者 杜思文