■陳展鵬做爸爸，興奮晒全家福。香港文匯報訊（記者 梁靜儀）陳展鵬與太太單文柔去年十月結婚，二人的愛情結晶品「小豬比」(Quinta)日前亦已出世，昨日展鵬在社交平台上載全家福照片，宣佈女兒「小豬比」已經出世，分享初為人父的喜悅。
榮升人父的展鵬在休息期間接受訪問，全程笑不攏嘴，展鵬說：「今日（昨日）復活節好開心，天氣好，演員又齊人，同埋終於公佈囡囡出世，(幾時出世？)大約一星期前，未改中文名，可能交畀長輩或太太改，暫時稱呼佢為小豬比，因為囡囡係豬年出世，加上太太叫菲比，結合埋就叫小豬比，其實之前一直都想跟大家分享，但每日都要開工。太太生完又要休息，怕佢應付唔到(傳媒)，又要餵人奶，大家要適應節奏，為了個BB改變好多。」問到可有人幫手湊B？展鵬提到陪月就稱一額汗：「本身有請陪月，但之前需要對方時，對方又去了旅行，諗住返來至開工，剛巧機場爆發麻疹，我們擔心陪月受感染，幸好對方驗身結果有抗體，可以即刻返屋企開工，所以頭幾日我們自己湊，有點甩轆。」他笑指囡囡非常之曳，唔可以讚，第一日有少少問題，他餵奶餵得唔夠飽，所以她不停喊，之後換了尿片她又喊，包布包得唔好又喊，之後他要上Youtube學包布，搞了五、六個鐘後又要開工。
買樓獎勵太太
問到可有陪太太入產房及幫BB剪臍帶？展鵬笑言：「全套服務做晒，唔係會畀人拉，我唔想畀人起訴，男人都要做晒所有嘢比較好，醫生都好好，由太太打麻醉針開始就畀我一直陪住佢。（見到BB有冇感動到喊？）我一直忙住安撫太太，自己都好緊張好驚，見到太太打針話痛都心痛，當時有一刻諗，捱得咁辛苦不如唔好生，見佢咁痛又要捱一刀，感覺好難受好心痛，好彩母女平安。」至於如何獎勵太太？展鵬表示一直都有，但太太好簡單，只要求他多陪伴。有指他買樓獎勵太太？展鵬也不否認：「都會，安排好，唔買過兩年都買。（一家三口搬去新屋？）未決定。」他又稱因近日都要開始開工，應不會擺滿月酒，可能擺百日宴。說到他太太生BB沒請假？展鵬表示因不想影響劇組，寧願自己唔瞓覺，幸好太太生B時通告唔密，並坦言試過遲到半小時，所以要向劇組及演員講聲唔好意思。