■汪明荃、森美、蘇永康、鄧佩儀及譚凱琪等前晚錄影《娛樂大家》。讚前輩馬國明對人好Warm
香港文匯報訊（記者 梁靜儀）汪明荃（阿姐）、森美、蘇永康、鄧佩儀、馮盈盈、陳凱琳及譚凱琪等前晚為無綫遊戲節目《娛樂大家》進行錄影。鄧佩儀近日要拍攝劇集《降魔的2.0》，與馬國明雖然只有一、兩場戲份，但讚對方好Warm。記者昨日見她男仔頭不再，留回長髮穿上裙子，她也坦言多了男仔追求，覺得男仔始終鍾意長頭髮。
鄧佩儀（Gloria）表示之前有翻睇過往幾集作參考：「覺得好難，好考轉數，好似IQ題咁，我對IQ題極度差。（驚輸？）又唔驚輸，最緊要帶到歡樂畀大家。」
Gloria 表示近日為劇集《降魔的2.0》開工拍攝，她表示與馬國明只有一、兩場戲份，好可惜，因為好欣賞他的演技。問到最近可有見到馬國明？她表示：「前日有。（有問候佢？）通常呢啲在心中，唔會再提太多，佢係一個好Warm嘅前輩，會主動打招呼、有好溫暖嘅笑容，但未深入傾過偈。（同黃心穎熟絡？）合作過一、兩次。」
留回長髮穿上裙子的Gloria笑言終於似返女仔，她指自己的衣着都會隨住髮型改變，問到可多了男仔追求？她笑着說：「今年同上年好大分別，始終男仔鍾意長頭髮，(之前去聚會被冷落？），又唔怪得佢哋。」
馮盈盈表示當晚是擔任客席主持， 她謂自小就睇好多遊戲節目，例如《獎門人》及《美女廚房》， 她之所以想入TVB 也是因為想上遊戲節目玩。向來玩得的盈盈， 被問到在阿姐面前會否收斂少少？她指其實阿姐都好玩得，所以會跟阿姐聯手攻陷其他人。
馮盈盈拍劇瘦足8磅
盈盈透露日前已拍畢劇集《極道怪咖》，為了該劇而留齊蔭造型的她，坦言經過3個半月之後，大家就覺得齊蔭好悶，所以前晚就玩中分蔭或其他髮型。
她透露已請假與中學女同學去泰國旅行，問到會否影泳衣照？她笑說要睇情況：「拍完劇後瘦咗好多，未拍之前有108磅，現得返100磅，但我係冇刻意減肥，（要帶定幾個胸墊？）瘦嘅話影出嚟會有骨感美！」 問到為何不約男友「寶寶」去旅行？盈盈指對方正努力溫書準備考試：「佢31歲人都仲溫緊書，要準備6月尾佢31年嚟最後一個專科醫生考試，對佢嚟講好緊要！原本我諗住伴讀，但作為一個好女朋友就要全力支持佢，就係出去玩，離開香港唔好騷擾佢、唔好阻住佢。」她笑謂去泰國會買多些熒光筆、原子筆送給男友作手信。為怕影響男友讀書，去完泰國後，盈盈6月又會同麥明詩去荷蘭。