■謝霆鋒（中）自言曾有興趣當導演。香港文匯報訊 第九集《鋒味前奏》，大廚謝霆鋒教大家整Party小食「墨西哥脆片」。一開始佢就同大家分享自己曾經用仙人掌去煮呢道菜，劉翁問仙人掌食落口個質感似乜，霆鋒就話質地似蘆薈，味道就似蘋果。劉翁再問：「仙人掌質地咁滑潺潺，有冇好似秋葵或者蘆薈咁令人(排洩) 暢順呢？」火火一聽到問題就爆笑，霆鋒就話：「咁我當日又無喎！」將所有洋葱、番茄，黑豆，粟米等食材處理好，火火就幫霆鋒開鑊，一開始炒洋葱，火火立刻炒到流晒眼淚，師傅霆鋒見到笑住拍一拍佢膊頭，鼓勵佢繼續努力。
一如以往，三人一邊煮一邊傾偈，火火問霆鋒有冇諗過做幕後，例如導演，霆鋒就好認真咁話：「我有呀，但係我驚冇朋友做，大家會同我絕交。」劉翁接住話十幾年前霆鋒曾經迷上攝影，鍾意到連廣告都拍埋，劉翁話自己那時好驚，仲好認真咁話：「我心諗你做埋我咪無得撈？好彩佢只係拍一個錶的廣告！」火火問霆鋒而家會唔會想玩番攝影，霆鋒就話自從有數碼相機之後佢就再無玩，因為自己比較鍾意菲林的質感。佢又講到現在的人對攝影無以前咁認真，「我覺得𠵱家影相，大家Delete相多過Save相。以前影相，攝影師就好似一個狙擊手，捕好耐只為一下快門，但而家就好似拎住兩支機關槍不斷影，影完就不斷Delete。」