馬會今季喺引入公司騎師方面認真做工夫，不斷嘗試搵多啲唔同地方同類型嘅騎師，亦避免騎師有日久成精嘅情況，只係呢批新騎師嘅騎功同質素，暫時所見水平一般，部份同見習騎師不遑多讓，跟公眾馬迷合理期望有距離。今季新騎師之中，利敬國首次客串就騎足全季，以成績睇都算合格。平心而論，佢陣上留放走位，步速掌握同頂級騎師都仲有距離，早前騎「日日精彩」大熱倒灶更加係醜態百出，完全發揮唔到隻馬嘅實力。
可能知恥近乎勇，利敬國之前夜馬即刻起孖，仲爆隻百六倍嘅冷門「盛勢」（圖9號），冇人睇好嘅馬都砌到盡，鬥志呢層真係抵讚，之後復活節日馬佢亦殺入幾席冷腳。講到尾佢係不折不扣嘅冷門騎師，唔可靠但好鬥志，馬迷捧利敬國都係先睇分頭，冷門唔怕拖一票，熱門就棄不足惜。香港馬場曾經被譽為騎師天堂，騎師人數充裕，固然有世界頂級高手，亦不乏有實力華將同見習生，練馬師同馬主不愁選擇。馬會咁多年嚟喺各方面亦一直提升，唔知點解唯獨招攬騎師方面不斷走回頭路，近日又話鬧騎師荒，頂級水平賽馬地區話唔夠騎師用，係咪搞笑？長年造成三兩個騎師壟斷，而唔係百花齊放競爭激烈，梗唔係健康發展。至於點解搞成咁，競賽小組當然有責任，全季公司騎師制度亦有問題，騎師坐冷板多過出賽，賽事獎金幾高都冇用。
蔡約翰同莫雷拉嘅主帥合約將會喺六月九號屆滿，最近已經通哂天，雷神繼續做主帥騎埋今季。雷神上季尾雄心勃勃決定去日本發展，點知玩咗幾個月就敗興而返，做蔡廄主帥其實都係搵個理由洗底，最終都係想下季留港做公司騎師，暫時都唔會再諗長駐日本。應家柏曾經公開暗批雷神，馬會唔係俾騎師話嚟就嚟、話走就走，但始終雷神係對投注額有叫座力嘅騎師，馬會都係做吓門面工夫俾啲說話岒央A佢肯留低絕對唔會抗拒，下季牌照委員肯定會發全季公司騎師牌俾雷神。
今季潘頓一人獨大，其中一個原因係冇競爭對手。雷神做返公司騎師，揀馬再冇限制，肯定大大提升競爭力，加埋田泰安，三個前領騎師已經盡攬實力馬，其他騎師睇怕又變返過去幾季等運到嘅處境。三兩個騎師玩哂，自然更難喺外地招攬新騎師，本地騎師亦唔見得好境，傷嘅傷罰嘅罰，剩低嘅都要打逆境波。講開又講，雷神咁想去日本，有時又唔係冇原因，人哋近年開放引入外籍騎師，長駐嘅李慕華同杜滿萊無疑做咗風頭躉，但係當地馬會同馬主依然好撐本土騎師，好似女騎師藤田菜七子都獲得支持跑大賽。問心嗰句，現時日本賽事水平比香港更高，難怪南北半球嘅頂尖騎師好似莫雅等，喺歐洲馬季停賽期間，都情願揀去日本客串亦唔嚟香港。