今季第一場新馬賽於四月十四日上演，結果係得七隻馬出賽嘅冷場，新馬賽近季唔知點解變咗雞肋，練馬師同馬主似乎都對報跑新馬賽冇乜興趣，馬會睇住盤數唔想拖低投注額，每有新馬賽例牌加場已成指定動作。過往馬會喺元旦一月一日安排新馬賽，各大馬房亦非常踴躍出馬，好多頭馬插班後更加係日後扶搖直上頂班嘅明星馬，至於過去兩季最好嘅新馬係「旺蝦王」同「薈力之城」。近季新馬賽舉行日期不斷押後，今季去到四月中至開波。現時每季自購新馬同拍賣馬數目肯定多過以前，反而報跑新馬賽嘅馬匹數目買少見少，好幾次更幾乎因為報名馬不足而要取消賽事，究竟出咗乜嘢問題？平心而論，新馬賽獎金一啲都唔低，差不多同四班賽獎金睇齊。四班賽經常有大超班嘅不明物體，馬主如果想滿足拉頭馬心願，點計新馬賽對手都較弱同成熟未足。當然，新馬抵港後操練進度難測，練馬師無需要急於派啲未操好嘅二、三歲馬夾硬跑新馬賽，跑傷隻馬仲得不償失。練馬師唔急於求功，或多或少同評分有關，今季等一等唔出賽，暑期總編班一律係插四班評五十七分或五十二分起步，插班後慢慢部署贏馬都未遲。相反跑新馬賽贏過馬或有表現，代價就係換來更高評分或插入三班，練馬師同馬主自然會考慮點做對隻馬更好。新馬賽到而家可有可冇嘅局面，究竟當中出咗乜嘢問題？唔否定新馬賽嘅存在，若馬會想繼續保留辦新馬賽，相關部門真係要深入探討吓，不斷延遲報名唔代表會催谷到更多馬出賽。
贏馬神器研訊賴仔罰十日
擾攘多時的「贏馬神器」事件，本周二終有結果，事緣現役資深華將賴維銘在3月17日第六場賽事策騎「贏馬神器」跑獲第三，但賽後卻遭競賽董事小組質疑他在千二米處至四百米處放得太快，並無盡全力為坐騎爭取最佳名次。騎者一直都不認同指控，競賽董事小組遂於本周二在跑馬地馬場研訊室就此事繼續進行研訊，聽取賴維銘的抗辯。賴維銘與「贏馬神器」練馬師葉楚航都有出席。
經過近兩小時審訊後，競賽董事小組公布賴維銘冇承認有關指控，但競賽小組依然判他違規，判罰停賽十日，不過罰則由3月31日開始生效，直至到5月1日完結，這代表賴維銘可在5月5日復出策騎。
至於這做法比較特別，在審訊完結後大幅追遡返那麼早的日期開始停賽，這等同沒有罰過一樣。