■軒仔換上多套衫，又唱又跳十分賣力。香港文匯報訊 張敬軒日前於馬來西亞雲頂舉行「Hinsideout」演唱會，可容納六千人的雲頂雲星劇場全場爆滿。為了照顧馬來西亞歌迷，軒仔除了特別安排一套新歌衫，歌單上的歌曲亦稍作調整，加插香港站沒有的國語歌，如《過雲雨》、《想你想得好孤寂》等作品，十分貼心。
演唱會上，軒仔換上多套靚衫，又唱又跳十分賣力，台下歌迷亦都好熱情，幾乎由開場嗌到完場。其間有歌迷向住軒仔大叫：「你好靚仔呀！」軒仔笑住話：「多謝你哋日行一善。」全場爆笑。另外，他又透露已經錄製全新國語碟，歌曲一半原創、一半翻唱，歌迷表示期待。
歌迷熱情 安哥兩次
兩小時的演唱會中，軒仔施展渾身解數表演，不過原來他抵埗馬來西亞後就病了，他在台上說：「呢件事我覺得實在太奇妙！所以想同大家分享。我落機時突然間覺得喉嚨痛痛哋，第二朝瞓醒就冇咗把聲，喺酒店房好徬徨，因為作為一個歌手冇咗把聲，而第二晚就要開show，冇聲點算呢？」他指主辦單位好貼心，擺了暖水等各種「醫療設備」在他的房間，軒仔說：「我都不斷祈禱，今晚開得返聲唱歌。當然好大部分力量係嚟自你哋（觀眾），謝謝大家！」
第一次安哥後，軒仔上台唱出《斷點》、《Hurt So Bad》、《只是太愛你》及《餘震》等經典歌曲。唱完《My Way》後，場館雖然已經開了燈，但一眾歌迷依然不肯走繼續大叫「安哥」，於是軒仔再次出場，唱出《愛情無關是非》及《煙雨斜陽》，兩次安哥後，演唱會終於圓滿結束。