許坤華及葉思貝兩夫婦今季嘅養馬運只屬一般，麾下嘅團體馬表現較出色嘅只有「不羈的風」。其餘與許坤華及葉思貝有關連嘅馬匹表現就平平，希望季尾來個大反彈搭上尾班車。今次夜賽屬呢對夫婦嘅戰馬空群而出，有第三場嘅「劍聶風」，第六場嘅「任我行」及「劍追風」同尾場嘅「邊個邊個」，除「邊個邊個」今季贏過兩場外，其餘三隻馬都未贏過。而由鄭俊偉所訓練嘅一對「劍」系馬，倉主無時無刻都希望能為馬主贏得頭馬，畢竟呢系馬係喺倉主成績低落嘅時候加盟支持，一番心意練馬師係感受到嘅。「劍聶風」今季喺告東尼倉跑過一仗就加盟鄭廄，另外第三班馬「劍追風」，上月底再加盟鄭俊偉馬房作支持，上手馬房係高伯新，跑咗兩季只係交出三次位置，表現最好一次係去季喺谷草一哩跟「與龍共舞」影相，最後輸馬鼻而屈居第二，最近加盟鄭廄，鄭俊偉不敢怠慢，首次替「劍追風」報名，即上場角逐有根有據嘅谷草一哩，由潘明輝操刀，結果放入季軍，以半個身位輸俾「好利運來」同「協勝神駒」，因為頭二馬只係影相爭冠，而「劍追風」有此表現，證明在三班是有建功能力。今次倉主為增加「劍追風」嘅爭勝機會，決定用陳嘉熙披甲，因為有十磅可減嘅優勢，上次潘明輝只獲減三磅已可上名，今次用十磅仔形勢更有利，再看今次同場嘅對手，已無「好利運來」呢類強敵在陣，呢隻馬只要沿途放喺前列走，係有機會贏番場。
