大摩七一大攻勢只贏得三場頭馬，餘下賽事要追蔡約翰應該較困難，蔡約翰今季蟬聯機會相當高，不過蔡約翰對大摩仍未敢抱輕視態度，大家可以從今次夜賽嘅報名馬得到啟示，因為過往蔡約翰並非太過熱衷谷戰，只有一些田戰能力較差嘅馬，先至會集中火力安排喺谷中窄場謀出路，好似今次夜賽嘅「歡喜心」、「勁皇子」同「醉翁意」。除呢幾匹只喺谷戰有過表現嘅馬列陣外，「邊個邊個」、「傑彩繽紛」同「明駿之星」都有報名上陣。當然「傑彩繽紛」同「邊個邊個」兩匹二班馬，以現時所剩下嘅賽程嚟睇，可以出賽嘅路程有限，故轉跑窄場求成績亦係無可厚非，不過，現時正值黃金當打期嘅「明駿之星」，三班賽程亦唔少，最近牠兩捷嘅田草千二米，七月一日就有賽程，不過，因為馬房有唔少同類型嘅戰馬要把握呢個出賽機會，所以「明駿之星」要讓路而改爭谷戰。而喺七月一日所舉行嘅第三班千二米短途賽，「明駿之星」就係讓路俾廄侶「友瑩囍」迎戰「忠心勇士」，至於「明駿之星」退而求其次，轉戰呢場谷草千二米，事實上，呢個亦係一個適當嘅安排，「友瑩囍」轉彎攞位欠靈活，如安排呢隻馬跑窄場，無疑係白費心機，相反「明駿之星」喺未有過上名表現時，馬房曾經安排隻馬跑過一場谷草一千米，獲得一席第五名，表現並唔差，所以馬房安排隻馬跑今次嘅谷草千二米，早已滿肚密圈。馬房替「明駿之星」嘅備戰過程，一如以往馬房替嗰啲當打馬嘅部署，贏馬後即安排返從化備戰，因為從化嘅馬格較闊大，可以俾馬匹充分嘅空間休息及伸展，所以通常贏馬後嘅蔡晷埲s，再返從化備戰，就係再次出擊嘅先兆，呢隻「明駿之星」今次如能順利替馬房再增添頭馬嘅話，蔡約翰呢個冠軍寶座就穩如鐵塔。