香港文匯報訊 樂壇女新人李靖筠（Gladys）日前為節目《騷動音樂》擔任客席DJ，為打響頭炮，首集Gladys就請來重量級嘉賓、公司「大家姐」霍汶希（Mani），二人在節目中大談經理人與藝人間的趣事，錄音結束後，Gladys仲製造小驚喜，送上蛋糕同Mani預祝生日，認真識做。
Gladys話完全冇諗過可以成功邀請到Mani上節目，「都係膽粗粗、搏一搏問吓，其實Mani朝早有工作做，陣間又要飛，點知佢真係應承，真係好開心。」節目中二人大放笑彈，講到點解會簽約公司，Gladys話係因為覺得Mani好有「雷」，Mani大笑話：「借問聲，短短時間，你何來覺得我有『雷』呢？」之後Gladys又話自己一心諗住做演員，問Mani點解要佢唱歌，Mani就話覺得佢有這能力，應該要試多啲，Mani說：「如果我推佢去死其實我都要死，哈哈，所以我唔會亂來，我都唔好害自己。」
錄完節目後，Gladys立即衝出錄音室，然後熄燈捧住蛋糕同一眾港台DJ入返錄音室，原來係為Mani預祝今日生日，許願時，Mani就話希望Gladys大紅大紫。