■朱茵香港文匯報訊 「性感女神」朱茵近日受邀出席巴黎時裝周，觀賞時裝騷，又分別換上性感撩人的魚尾貼身長裙，和型格十足的橘色西裝登場，展現截然不同的魅力。第三次受邀參加時裝周的朱茵，心情仍然興奮，「我覺得出席時裝周最好玩嘅地方，就係可以嘗試平日較少接觸嘅衣着打扮，同時以朝聖嘅心態，吸收最新時尚資訊。喺巴黎短短幾日，見到當地人喺穿搭上充滿自信，呢方面好值得我哋借鏡，每個人都應該具備自信。」
朱茵除了對於時尚甚有心得，更尤其注重養生，「對我嚟講，養生比一切重要，因為養生係由內到外，當你擁有一副健康嘅身體，皮膚自然會好，亦有自信駕馭不同造型。」
至於她的時尚顧問，原來是最親密的枕邊人黃貫中（Paul）：「平日經常同老公交流時尚心得，我最鍾意問佢意見，佢一話顯肥，我就唔會買；如果佢話靚，我就一定會買，始終佢曾經攞過『十大衣着人士』，同埋佢係一個唯美主義者，所以我絕對相信佢嘅眼光，呢一種時尚交流，都係兩公婆的情趣，哈哈。」
愛美的朱茵攞正牌獎勵自己，「今次應該係出血最多的一次，淨係鞋都買咗五對，仲有衫同手袋！不過我都冇忘記老公同囡囡，明日係喺巴黎的最後一日，我會留足全日為他們『血拚』。」血拚再有樂趣，也難及家人團聚，朱茵完騷後只會逗留一天便匆匆回港，「留一日已經夠奢侈，自己都歸心似箭，因為囡囡現在讀小學，好多嘢要兼顧，媽媽的支持係好重要，我返到香港第二日就要參加阿女學校活動，所以都要趕返去，同埋我真的好掛住她們啊！」