雷神與潘頓雖然騎技了得，但並非每位練馬師都倚重佢哋，韋達就係其一，十三少搵得呢兩位仁兄上陣馬都唔係超班馬貨色，好似雷神替呢個倉贏嗰隻「承你所願」，真係要騎到甩晒轆先有得贏，講到潘頓，俾隻老處馬「超能量」佢跑，結果用盡所有法寶，最叻得兩席第二名。又好似姚本輝咁，今季十二場頭馬，除兩場由莫雷拉贏之外，其餘全部由二線兵取得，再睇莫雷拉所贏兩駒，都係奇難雜症馬，「王者再現」及「王者奇兵」一對同主馬，前者大家都唔會知佢幾時嚟料，皆因屬尺寸型馬，要騎得好又要環境配合，今季由雷神所贏個場谷草千八米，大家認為雷神贏得靚唔靚？另外呢隻「王者奇兵」，未由莫雷拉沾手前，上季搵夏禮賢及郭能跑，場場都有飛，但場場都唔知跑去邊，今季用人對症下藥即贏冇得好講。
今次「王者奇兵」吼番贏馬路程列陣，賽前備戰依然積極到暈，兩個禮拜前經已搵番莫雷拉替呢隻馬進行一課快跳工夫，仄準狀態有否變化，可能雷神仄到呢隻馬狀態仲可以提升好一啲，上周一夜賽最後試跑朝，佢專登留耐少少，等所有周三戰馬最後試跑完畢後，再親自為呢隻「王者奇兵」私底下彈課草閘，結果反應良好，閘開一氣呵成直領到底，呢課大閘氣勢所見的確又再進一步。馬房今次落王牌安排「王者奇兵」再戰開齋路程千二米，顯然是鎖定連捷目標，當然同場大家會視方廄「晨曦飛馬」為勁敵，因為此駒亦是新勝此程，贏馬時間稍比「王者奇兵」好，但馬房手足有信心，「王者奇兵」上場贏第二名馬「健康在望」個半身位，末段經已呈半收韁姿態，相反「晨曦飛馬」贏「太陽戰馬」，鞍上人潘頓全程守好位一步不蝕，最終先至追及「太陽戰馬」贏半個身位，兩者即使保持進度，「王者奇兵」質素必好過「晨曦飛馬」。