因為社會運動關係，現今唔少商業活動都非常低調處理，好似周日所舉行的每年一度盛事莎莎銀女銀袋賽，今年就比往年低調好多，呢個賽日一直以來均受到大眾支持，所以屆時必定有唔少觀眾入場睇靚女衣着及買吓馬仔。由於贊助商本身亦屬賽馬發燒友，郭氏家族現役所養的馬匹數目，應是數一數二，大凡莎莎婦女銀袋賽馬日，佢旗下有分量戰駒必會出席，不過出自大摩馬房嘅「美麗甜心」，竟提早在今次夜賽出戰三班千二米，查周日在沙田所舉行之莎莎婦女銀袋賽馬日，第三班千二米是有賽程編排，以「美麗甜心」上季在此程的表現，曾兩次跑入位，一次得第三名，頭二馬分別是「翠湖飛鷹」及「友瑩囍」，另一場得亞軍，亦只是輸俾「友瑩囍」，一連兩次輸俾「友瑩囍」絕不失禮，睇睇今季後駒一出即贏到「牛角仔」冇得跑，大家計計數，只要三班跑田草千二米，陣上遇唔到「友瑩喜」及「翠湖飛鷹」之流嘅對手，佢應該好大機會贏馬。「友瑩囍」季內一出即勝，經已升上二班，所以正路計，「美麗甜心」跑周日三班千二米，應該唔會有機會遇太強對手，照計應該出戰這場日賽，在自己商品贊助日贏馬威威，但幕後交俾大摩全權部署，大摩決定跑呢次谷草千二米。再睇呢隻馬兩周前經已交雷神過檔，上周二再搵雷神彈課千二米泥地大閘掄元，近況證明弗到不得了，大摩呢個部署手法，谷戰都跑，就知隻「美麗甜心」呢次贏面有幾高。