上個禮拜二，「轉數高」馬主許駿源在火炭某大酒樓擺慶功宴，賀佢名下愛駒今季再贏頭馬，出席者除賀廄上下員工，仲有賀賢太太李姿敏及佢家姐Jane，家姐遠道從澳洲來港探望，不過只是逗留幾天，上周末經已返回澳洲，不過，做弟弟嘅點會冇水腳關照家姐，上周三夜賽，賀廄便憑半冷馬「勤得兼備」再增添頭馬，開跑前十倍，到開跑得番九倍，顯然有部分人捉到路，當晚賀賢家姐Jane同馬主一家人影相，總算離港前冇白行一趟入場撐細佬。
「轉數高」上季開齋路程屬千四米，當時由蘇狄雄打開勝門，不過馬房很快便找出這駒的長處，就是擅跑谷草一哩，翌仗再出即轉移場地往谷草跑一哩，臨場一樣有硬淨賠率支持，五倍開跑最終取得第二名而回，該場頭馬是「星運判官」，當然，這仗之敗可以歸咎「轉數高」是初跑一哩，欠多少經驗所致，不過，幕後似乎有保留態度，敗後再來一次角逐谷草一哩，該仗強配潘頓一試，果然由冠軍級人馬執韁又是另一番的演繹，臨場兩倍馬以近七個身位贏第二名的「安賦」，谷戰能贏兩三個馬位的賽果不多，該仗「轉數高」在四班贏一哩近乎七個馬位取勝，鞍上人似是告訴幕後，這匹是一哩超級好手。這個確是潘頓的本領，因為之前擊敗「轉數高」的「星運判官」，在第三班也有能力贏一哩，落到四班遇到「轉數高」，竟要鞍上人何澤堯出盡九牛二虎之力才能險勝，潘頓經已一早盤算出「轉數高」確非池中物，今季馬房先安排牠跑谷草短途作熱身，翌仗跑贏馬路程一哩，配回潘頓即手起刀落再贏，幕後經已安排季內鴻圖大計，便是向百萬挑戰賽進軍，上賽潘頓替「轉數高」贏完馬後，已一早卜定今次策騎權，賀賢今季數糊籌碼，這駒應是其中之一。