■馬浚偉和李明蔚一同製作小手工， 宣揚抗癌正能量。香港文匯報訊（記者 梁靜儀）馬浚偉（馬仔）昨日到觀塘出席主演的微電影《重啟．希望》分享會，好友兼「抗癌歌手」李明蔚亦有到場支持，並一同製作小手工， 宣揚抗癌正能量。
電影中馬仔飾演一名醫生，爸爸患有肺癌，媽媽亦因癌症離世，馬仔坦言角色跟現實中的他相似，故不用多做功課：「我屋企都有兩個癌症病人，我好明白嗰種無助，所以我拍得好投入，有場戲要我喊，導演問我使唔使醞釀情緒，我話唔使，之後我拎住戲中爸爸寫畀我封信，睇睇下就喊到，一take過搞掂。」馬仔表示當時想起患癌的媽媽都曾寫過字給他，因而觸動到他，所謂戲如人生，分別是現實中他不是醫生，但感受一樣。
到各區busking 不擔心安全
作為過來人，馬仔希望大家關心癌症病人之餘，也希望大家關心他們的家人，好像他當時因不懂紓緩情緒，媽媽離世後一度很自責，結果患了抑鬱症八年，之後再患上驚恐症，他說：「我𠵱家都好怕電話響，怕好似以前咁，係醫院打嚟，以前半夜一聽到電話響，成個人會紮醒，所以現在屋企電話同手機全部都校靜音，試過突然聽到好大的電話響聲，成個人即時好不安，現在都有keep住睇醫生同食藥，我有時口黑面黑面青青走埋一邊唔好怪我，就係驚恐症發作。」
談到工作，馬仔表示正籌備開拍一部電影及舞台劇，還有自組組合MTOM到各區busking，他說：「我會睇情況，會揀安全時間同地方，我唔係太擔心，始終相信香港人係善良、互助互愛。」他續稱早在九月已在火炭開始了第一次busking，十二月會是第二次，地點暫時還未定。他又笑指組合共有三個人，希望不會構成非法集結。