第六場、第三班、一二○○米。「飛天劍」一如「競技勇士」在紐西蘭由練馬師莫朗尼訓練，於當地十一戰獲一冠一亞兩季，首仗在奧塔奇一放到底贏出一千米兩歲定磅賽，也曾在千二米一級賽系統錦標憑天生速度跑第四，可見「飛天劍」是靠放搵食，牠曾在千四米三級賽碎骨機錦標與「星運明爵」同場，當時後駒贏馬，本身則跑第十，可見只宜短途搵食；「飛天劍」上次在港初出泥地千二只跑第九，不妨當為一課試閘，今次返回草地合腳法得多，隨時可以變身。
第八場、第三班、一二○○米。有時見到舊馬名重用，倍覺親切，好似早前初出「海豚星」及「至叻仔」，到今次「大自然」都係舊瓶新酒，對上一匹「大自然」其實唔算太久遠，咁今次呢匹「大自然」得唔得？信者就跟，拎呢隻做話題，純粹借意講吓故事。上一匹「大自然」馬主莊學山，係富豪李嘉誠舅仔，論養馬，佢外父莊靜菴即莊學山爸爸就早好多，最近已數到大告「大時代」，再之前嘅馬係支持老摩，反而莊靜菴另一個仔莊學海，有「大快樂」由黃汝安練過，爆過一次九十九倍。講番新呢隻「大自然」，上次初出泥地走勢唔差，開咗氣轉來谷草已虎視眈眈。